२४ जेठ २०८३, आइतबार
नेकपा ओली समूहका प्रवक्ता एवं परराष्ट्रमन्त्री प्रदीप ज्ञवालीले प्रधानमन्त्री केपी शर्मा ओली कामचलाउ नभएको बताएका छन् ।
प्रतिनिधि सभा विघटन भएसँगै कतिपयले ओली सरकार कामचलाउमा परिणत भएको टिप्पणी गरिरहेका छन् ।
प्रधानमन्त्री निवास बालुवाटारमा बिहीवार बसेको ओलीपक्षीय केन्द्रीय समिति सदस्यको बैठकपछि पत्रकारहरूको एक प्रश्नको जवाफमा मन्त्री ज्ञवालीले ओली काम चलाउ प्रधानमन्त्री नभएको बताएका हुन् ।
‘राष्ट्रपति कार्यालयको पत्र पढ्नु भएको होला, प्रधानमन्त्रीज्यू कामचलाउ होइन, फुलफ्लेज प्रधानमन्त्री हो,’ ज्ञवालीले भने ।
नेकपा प्रवक्ता समेत रहेका मन्त्री ज्ञवालीले प्रतिनिधि सभाजस्तै प्रदेश सभा विघटन गर्नेतर्फ सरकारले नसोचेको बताए ।
प्रधानमन्त्री ओलीले बुधवार एक टेलिभिजन कार्यक्रममा प्रदेश सरकारलाई काम गर्न नदिए थप कदम चाल्ने बताएका थिए ।
मन्त्री ज्ञवालीले मन्त्रिपरिषद् छिट्टै पुनर्गठन हुने पनि बताए ।
‘मन्त्रिपरिषद् छिट्टै पुनर्गठन हुन्छ, केन्द्रीय कमिटी बैठक सकिएपछिको पहिलो काम यही हुन्छ,’ बिहीवार बालुवाटारमा बसेको नेकपा केन्द्रीय समितिको बैठकपछि ज्ञवालीले भने ।
प्रतिनिधि सभा विघटनको भोलिपल्ट नेकपा अध्यक्ष पुष्पकमल दाहाल प्रचण्ड र माधव नेपाल समूहका ७ मन्त्रीले राजीनामा गरेका थिए । रिक्त ७ स्थानमा नयाँ मन्त्री थपेर पुनर्गठनको तयारी भएको नेकपा स्रोतले बतायो ।
