३० जेठ २०८३, शनिबार
नेपाल कम्युनिस्ट पार्टी (नेकपा) प्रचण्ड–नेपाल पक्षका अध्यक्ष पुष्पकमल दाहाल ‘प्रचण्ड’ पत्नी सीता दाहालको उपचारका लागि परिवारका सदस्यहरू भारतको मुम्बई प्रस्थान गरेका छन् ।
मुम्बईमा दाहालको उपचार न्युरोजेन ब्रेन यान्ड स्पाइन इन्स्टिच्युटमा हुने प्रचण्डका प्रेस संयोजक विष्णु सापकोटाले जानकारी दिए ।
प्रचण्डपत्नी दाहाल लामो समयदेखि अस्वस्थ रहँदै आएकी छन् । पार्किन्सनको बिरामी रहेकी सीता सुगर र उच्च रक्तचापबाट पनि पीडित छिन् ।
सीतालाई उपचारका लागि यसअघि भारत, सिंगापुर र थाइल्याण्ड लगायतका अस्पतालमा लगिएको थियो । केही दिनअघि मात्र उनलाई राजधानीस्थित मेडिसिटी अस्पतालमा भर्ना गरेर उपचार गरिएको थियो ।
दाहालको उपचारका लागि प्रचण्डसँगै छोरीहरू रेनु दाहाल र गंगा दाहाल समेत भारत प्रस्थान गरेका छन् ।
नेकपा विभाजनसँगै राजनीतिक संकट गहिरिएका बेला प्रचण्डले पारिवारिक कारणबाट छिमेकी देश भारत जानुपरेको छ । प्रचण्ड–नेपाल पक्षीय नेकपाले संसद विघटन गर्ने सरकारको निर्णयविरुद्ध देशव्यापी आन्दोलन गरिरहेको छ ।
