२० असार २०८३, शनिबार
विन्ध्यवासिनी म्युजिक कम्पनीकी प्रमुख कार्यकारी अधिकृत (सीईओ) लीना शर्मा रेग्मीलाई प्रहरीले प्रकाउ गरेको छ ।
प्रतिलिपि अधिकार उल्लंघन गरेको भन्दै गायक प्रमोद खरेलले विन्ध्यवासिनी म्युजिकविरुद्ध जाहेरी दिएपछि उनलाई महानगरीय प्रहरी परिसर काठमाडौंले पक्राउ गरेको परिसरका प्रवक्ता प्रमेश बिष्टले बताए ।
गायक खरेलको जाहेरीमा विन्ध्यवासिनी म्युजिकका सञ्चालक सुवास रेग्मी र लीना शर्माको नाम समावेश गरिएको थियो । लीना र सुवास श्रीमान श्रीमती समेत हुन् ।
सुवास भने काठमाडौंबाहिर रहेकाले उनलाई पक्राउ गर्न नसकिएको प्रहरीको जनाएको छ ।
प्रहरीले यस विषयमा अनुसन्धान गरिरहेको प्रतिक्रिया दिएको छ ।
गायक खरेलले विन्ध्यवासिनीसँग ‘प्रणय’ एल्बमको सम्झौता सकिएपछि फिर्ता माग्दा सार्वजनिक रूपमा गालीबेइज्जती र इज्जतमाथि दाग लगाउने विभिन्न गतिविधि भएको भन्दै प्रहरीको सहयोग माग्न पुगेका थिए ।
केही दिनअघि सञ्चालक सुवास रेग्मीले लोकान्तरसँग कानूनले जे भन्छ त्यो गर्न तयार रहेको तर त्यसअघि एल्बम फिर्ता दिन नसक्ने बताएका थिए ।
गायक प्रमोदले उक्त एल्बमको सम्झौता २०७१ मै सकिएको बताए । पटक–पटक एल्बम फिर्ता माग्दा नदिएको विन्ध्यवासिनीले उल्टै आफूले उत्पादन गरेको गीत विना अनुमति गाएको आरोपसहित १ करोडको क्षतिपूर्ति दाबी गर्दै कम्पनी रजिस्ट्रार कार्यालयमा उजुरी दिएको थियो ।
त्यसपछि नेपालका ६ दर्जन कलाकारहरूले हस्ताक्षर गर्दै प्रमोदको पक्ष ऐक्यबद्धता जनाएका थिए ।
प्रमोदले छिट्टै मानहानीको मुद्दामा जाने तयारी गरिरहेको बताएका छन् ।
प्रमोदको उक्त एल्बममा ८ वटा गीत समावेश छन् ।
