२० असार २०८३, शनिबार
अमेरिकाका राष्ट्रपति जो बाइडनले बुधवार कर्मचारीहरूलाई पद तथा गोपनीयताको शपथ दिलाउँदै एकअर्कालाई सम्मान गर्न आग्रह गरेका छन् ।
अपमान गर्नेलाई ठाउँको ठाउँ बर्खास्त गर्ने चेतावनी उनले दिएका छन् ।
स्टेट डाइनिङ रूममा बोल्दै बाइडनले जीवनभरि अपनाएको मर्यादा पालनमा जोड दिए । उनले नवनियुक्त कर्मचारीहरूलाई संसारको सबभन्दा मर्यादित सरकारसँग काम गरिरहेको र सबैले मिलेर देशको आत्मा पुनर्बहाली गर्नुपर्ने बताए ।
‘जसको जे पृष्ठभूमि भए पनि प्रत्येक व्यक्तिको मर्यादालाई सम्मान गर्नुपर्छ,’ बाइडनले भने । ‘तपाईंहरूले यसलाई मनन गर्नुहुन्छ भन्ने मेरो अपेक्षा छ ।’
पूर्ववर्ती राष्ट्रपति डोनल्ड ट्रम्पको कार्यकालमा कर्मचारीहरू एकले अर्कालाई हेप्ने, कुरा चुहाइदिने लगायत काम गर्ने गरेका थिए । त्यसलाई बाइडनले अन्त्य गर्न खोजेका छन् ।
उनले कर्मचारीहरूलाई आफूप्रति भन्दा पनि अमेरिकी जनताप्रति बफादारिता कायम गर्न आग्रह गरे । ट्रम्पले अरू कुराभन्दा पनि उनीप्रतिको बफादारितामा जोड दिएका थिए ।
‘मानिसहरू हाम्रा लागि काम गर्दैनन्, हामी मानिसहरूका लागि काम गर्छौं,’ बाइडनले भने । ‘म मानिसहरूका लागि काम गर्छु । उनीहरूले मेरो तलब बेहोर्छन् । उनीहरूले तपाईंहरूको तलब बेहोर्छन् ।’
