३० असार २०८३, मंगलबार
प्रतिनिधि सभा विघटनविरुद्ध परेका रिटमाथिको सुनुवाइमा बहस गर्ने कानून व्यवसायीका लागि समय तोकिएको छ ।
प्रधानन्यायाधीश चोलेन्द्र शमशेर जबराले बढीमा १५ मिनेट मात्र बहस गर्न पाउने गरी समय तोकिएको बुधवार जानकारी गराएका छन् ।
प्रधानन्यायाधीश जबरा नेतृत्वको संवैधानिक इजलासमा केही वरिष्ठ अधिवक्ताले घण्टौं बहस गरेका थिए ।
बुधवार दशौं दिनको सुनुवाइ सकिँदै गर्दा प्रधानन्यायाधीश जबराले बहस छोट्ट्याउन अधिवक्ताहरूलाई आग्रह गरेका हुन् ।
बुधवार नै न्यायाधीश सपना प्रधान मल्लले यो मुद्दा कति लम्ब्याउने भन्दै रिट निवेदक मध्येका एक विघटित प्रतिनिधि सभाका सदस्य कृष्णभक्त पोखरेलसँग प्रश्न गरेकी थिइन् ।
जवाफमा पोखरेलले आफूहरू पनि बहस नलम्बियोस् भन्नेमा सचेत रहेको बताएका थिए ।
बुधवार नेपाल बार एसोसिएसनका पूर्व अध्यक्ष एवं वरिष्ठ अधिवक्ता शेरबहादुर केसीले बहस गरेका थिए ।
यस्तै पूर्व महान्यायाधिवक्ता डा. युवराज संग्रौलाले बहस गरेका थिए ।
संग्रौलाले प्रतिनिधि सभा विघटन सदर भए भविष्यमा कुनैपनि संसद्ले कार्यकाल पूरा गर्न नसक्ने बताएका थिए ।
प्रतिनिधि सभा विघटनविरुद्ध परेका रिटमाथि माघ ४ गतेदेखि अन्तिम सुनुवाइ चलिरहेको छ ।
