३० जेठ २०८३, शनिबार
नेपाल कम्युनिस्ट पार्टी (नेकपा) प्रचण्ड–नेपाल समूहका अध्यक्ष पुष्पकमल दाहाल ‘प्रचण्ड’ले सर्वोच्च अदालतले प्रतिनिधि सभा पुनःस्थापना गर्नेमा आफूलाई आशंका नभएको बताएका छन् ।
तर सबैभन्दा ठूलो फैसला जनताको हुने उनले टिप्पणी गरे ।
‘अदालतमा अहिले मुद्दा छ, मलाई विश्वास छ, अदालतले संसद् पुनःस्थापना गर्नेछ । म त्यो विश्वास व्यक्त गर्न चाहन्छु । म अहिले केही आशंका गर्न चाहन्न,’ मंगलवार बुटवलमा आयोजित विरोध सभामा प्रचण्डले भने, ‘तर सबैभन्दा ठूलो अदालत जनताको अदालत हो, तपाईंहरूको अदालत हो, तपाईंहरूको फैसला हो ।’
माघ ९ गते प्रचण्डले काठमाडौंको सभामार्फत अदालतलाई धम्क्याउन खोजेको भन्दै प्रधानमन्त्री केपी शर्मा ओलीले आपत्ति जनाएका थिए ।
‘काठमाडौंको सडकमा उर्लेको जनसागर हाम्रो अदालत र निर्वाचन आयोगले राम्रोसँग देख्छ । ऐतिहासिक फैसलामा जनताको मनोभावना के छ भन्ने कुरा एउटा फ्याक्टर हुने गरेको छ,’ प्रचण्डले माघ ९ गते भृकुटीमण्डपको सभामा भनेका थिए ।
माघ १२ गते दाङमा आयोजित कार्यक्रममा प्रधानमन्त्री ओलीले प्रचण्डले सर्वोच्चलाई धम्की दिने भाषा बोलेको आरोप लगाएका थिए ।
‘एकजना नेताले अस्ति चार दिनअगाडि बढो धुमधामसँग भने । कसैले पनि यहाँ अशान्ति चाहेको छैन, कसैले पनि अराजकता चाहेको छैन । अदालतले हाम्रै पक्षमा फैसला गर्छ भन्ने हामीलाई विश्वास छ । तर गरेन भने..., भन्या के ? कसैले अशान्ति चाहेको छैन । कसैले अराजकता खोजेको छैन रे, अदालतले हाम्रो पक्षमा फैसला गर्नुपर्छ रे, गरेन भने..., नत्र ? के खोजेको रहेछ उहाँहरूले ?’ ओलीले प्रश्न गरेका थिए ।
'निरंकुशता चुट्कीको भरमा ढल्छ'
बिहीवार बुटवलको सभामा प्रचण्डले केपी ओलीको निरंकुशता चुट्कीको भरमा ढल्ने जिकिर गरे ।
‘म आफैंले प्रधानमन्त्री र पार्टी अध्यक्ष प्रस्तावित गरेका केपी ओलीले श्री ३ महाराज बन्ने सपना देखेका छन्, राजतन्त्रलाई लात्ती हान्ने नेपालीले ओलीको निरंकुशता स्वीकार्दैनन् । ओलीको निरंकुशता चुट्कीको भरमा ध्वस्त हुनेछ,’ प्रचण्डले भने ।
हामी आधिकारिक– माधव नेपाल
सभामा प्रचण्ड–नेपाल समूहका अर्का अध्यक्ष माधवकुमार नेपालले पुष्पकमल दाहाल ‘प्रचण्ड’ र आफूले नेतृत्व गरेको नेकपा नै नेकपाको मूलधार भएको दाबी गरे ।
‘निर्वाचन आयोगले ४४१ केन्द्रीय सदस्यको बहुमत जहाँ छ, त्यही आधिकारिक भनेर निर्वाचन आयोगले भनिसकेपछि त्यही पार्टी नै मूल पार्टी हो । प्रचण्ड र मैले नेतृत्व गरेको पार्टी आधिकारिक हो,’ नेपालले भने ।
नेता नेपालले आफूहरूको पक्षमा देशभर लहर लागेको दाबी गर्दै सूर्य चुनाव चिह्न पनि आफूहरूको पक्षमा आउने दाबी गरे ।
