सामाजिक युवा अभियान्ता केपी खनाल संघीय राजधानीको माइतीघर मण्डला लगायत क्षेत्र सफा गर्न कैलालीबाट काठमाडौं आएका छन् ।

गृहजिल्ला कैलालीमा सरसफाइ र गरीबलाई सहयोग अभियान चलाउँदै आएका खनालले काठमाडौं आएर शनिवार माइतीघर मण्डला, बबरमहल, नयाँ बानेश्वर क्षेत्रमा सरसफाइ गरेका छन् ।

‘राजनीतिक आन्दोलनले राजधानी फोहोर भएको थियो, हाम्रो अभियानले सफा गरेको छ, साथीहरूले सहयोग गरेका छन्,’ अभियान्ता खनालले लोकान्तरसँग भने ।

मैनादेवी फाउन्डेसनको आयोजनामा भएको ‘क्लिन काष्ठमण्डप अभियान’ले केही दिनदेखि राजनीतिक आन्दोलनले फोहोर बनेको माइतीघरदेखि बानेश्वरसम्मको मार्गमा सफाइ गर्दै फोहोर नगर्न अनुरोध समेत गरिएको अभियान्ता खनालले बताए ।

सरसफाइ अभियानमा कमेडी च्याम्पियन हिमेश पन्तको प्रमुख उपस्थिति रहेको थियो ।