२८ जेठ २०८३, बिहीबार
राष्ट्रिय सभाका अध्यक्ष एवं संवैधानिक परिषद्का सदस्य गणेश तिमिल्सिनाले परिषद्ले विभिन्न निकायमा गरेको सिफारिश अनुसार पदाधिकारी नियुक्त हुने बताएका छन् ।
सभामुख अग्नि सापकोटाले परिषद्को पत्र फिर्ता गरेको विषयमा असहमति जनाउन सोमवार संसद् सचिवालयमा आयोजित पत्रकार सम्मेलनमा तिमिल्सिनाले नियुक्तिका लागि समस्या नभएको बताएका हुन् ।
‘अदालतले अन्यथा भनेबाहेक नियुक्ति हुन्छ, संसद् नभएको समयमा सुनुवाइविना पनि नियुक्ति हुनसक्छ,’ तिमिल्सिनाले भने ।
अध्यक्ष तिमिल्सिनाले संसदीय सुनुवाइ विशेष समितिले दुईतिहाइले अस्वीकृत गरेबाहेक सभामुखलाई पत्र फिर्ताको अधिकार नभएको बताए ।
‘संघीय संसद् भनेपछि एक सदन मात्र होइन, दुईवटा सदन मिलेर संघीय संसद् बनेको हो । संघीय सदनका दुई प्रमुख बराबर हौं । सुनुवाई समिति संयुक्त हो,’ तिमिल्सिनाले भने, ‘संयुक्त समितिले गर्ने निर्णयमा हामी बराबरी हौं । राष्ट्रिय सभालाई छैन जस्तोगरी हिजोको भाषा आएकोमा मेरो आपत्ति छ ।’
संविधानको धारा ११४ मा संसद्ले अस्वीकार गरेको बाहेक अध्यादेश कानूनसम्मत हुने भएकाले संवैधानिक परिषद्का सिफारिश विधिसम्मत भएको उनले बताए ।
‘सभामुखको इन्टेन्सन के छ मैले कहाँ व्याख्या गर्नु ? दल त्यागेर बसिरहेको मैले मेरो जिम्मा लिन्छु । म दलीय स्वार्थले संविधान, ऐन र नियमावली तथा मूल्यमान्यता जे छन्, त्यसभन्दा दायाँबायाँ जादिनँ,’ पत्रकारको एक प्रश्नको जवाफमा तिमिल्सिनाले भने ।
