२३ जेठ २०८३, शनिबार
नेपाल कम्युनिस्ट पार्टी (नेकपा) प्रचण्ड–नेपाल समूहले गरेको आमहड्तालविरुद्ध नेकपा ओली समूहका कार्यकर्ताले पोखरामा र्याली प्रदर्शन गरेका छन् ।
कास्कीको पर्यटकीय नगरी पोखरामा पनि बन्दको प्रभाव परेको छ ।
शिक्षण संस्था, कलकारखाना, विद्यालय, व्यापारिक प्रतिष्ठान, पसल, यातायात बन्द छन् । बन्दका कारण सर्वसाधारणले दुःख व्यहोर्नुपरेको छ ।
पोखराका सडकमा गन्तव्य पुग्न मानिसहरू पैदल हिँडेको देख्न सकिन्छ ।
बन्द आह्वानकर्ताले सडकका चोकचोकमा बसेर बन्द सफल पार्न नाराबाजी गरिरहेका छन् । उनीहरूले कोही व्यक्ति मोटरसाइकल, स्कुटरमा चढेको देखेमा एक्कासी बाटोमै रोकेर केरकार गर्ने गरेका छन् ।
नेकपाको प्रचण्ड–नेपाल समूहका नेता तथा कार्यकर्ता ठूलो संख्यामा चोकचोकमा खटिएका छन् । गण्डकी प्रदेश सांसद, प्रदेश तथा जिल्ला तहका इन्चार्ज, अध्यक्षहरू चोकमा खटिएका छन् ।
गण्डकी प्रदेश विशेषतः नेकपामा ओली पक्षको बलियो प्रदेश मानिन्छ ।
