चालु आर्थिक वर्ष (२०७७/७८) को पहिलो ६ महिनामा लुम्बिनी प्रदेशले सबैभन्दा बढी बजेट खर्च गरेको छ । 

चालु आवको साउनदेखि पुस मसान्तसम्ममा लुम्बिनी प्रदेशले २२.८ प्रतिशत खर्च गरेको हो । 

अर्थमन्त्रालयले मंगलवार बजेटको अर्धवार्षिक समीक्षा गर्दै सबैभन्दा बढी बजेट खर्च गर्ने प्रदेश लुम्बिनी भएको जनाएको हो । 

लुम्बिनी प्रदेशले ३६ अर्ब ३५ करोड २५ लाख रुपैयाँ बजेट यस आर्थिक वर्षभित्रमा खर्च गर्ने लक्ष्य लिएको थियो ।

जसमध्ये पहिलो ६ महिनामा यस प्रदेशले ४ अर्ब ७४ करोड ७५ लाख रुपैयाँ चालु खर्च गरेको छ । १७ अर्ब ७३ करोड २५ लाख रुपैयाँ चालु खर्चका लागि बजेट विनियोजन भएकोमा प्रदेशले २६.७७ प्रतिशत खर्च गरेको हो । 

यस्तै लुम्बिनी प्रदेशले १८ अर्ब ६२ करोड पुँजीगततर्फ बजेट विनियोजन भएकोमध्ये हालसम्म १९.२ प्रतिशत खर्च गरेको छ । पहिलो ६ महिनामा यस प्रदेशले ३ अर्ब ५४ करोड २१ लाख रुपैयाँ बजेट खर्च गरेको हो । 

यस्तै प्रदेश नम्बर १ ले विनियोजित बजेटको १८.६८ प्रतिशत खर्च गरेको छ । अर्थमन्त्रालयले चालु आव २०७७/७८ का लागि कुल ४० अर्ब ८९ करोड ९९ लाख रुपैयाँ बजेट अनुमान गरेको थियो । जसमध्ये चालुतर्फ १८ अर्ब ९३ करोड ४९ लाख रुपैयाँ बजेट विनियोजन भएको थियो । विनियोजित बजेटमध्ये यस प्रदेशले पुस मसान्तसम्ममा १४.७१ प्रतिशत अर्थात २ अर्ब ७८ करोड ५० लाख रुपैयाँ खर्च गरेको छ । 

यस्तै पुँजीगत तर्फ प्रदेश नम्बर १ ले २२.१४ प्रतिशत खर्च गरेको छ । कुल २१ अर्ब ९२ करोड ५० लाख रुपैयाँ विनियोजन गरिएकोमध्ये पुस मसान्तसम्म ४ अर्ब ८५ करोड ३८ लाख रुपैयाँ खर्च गरेको हो । 

पुस मसान्तसम्ममा गण्डकी प्रदेशले विनियोजित बजेटको १५.१३ प्रतिशत खर्च गरेको छ । 

यस प्रदेशले पुँजीगत तर्फ १९ अर्ब ९९ करोड ९५ लाख रुपैयाँ विनियोजन गरेकोमा १६.५५ प्रतिशत अर्थात ३ अर्ब ३० करोड ९५ लाख रुपैयाँ खर्च गरेको छ । 

यस्तै चालुतर्फ १४ अर्ब ३४ करोड २७ लाख रुपैयाँ विनियोजन गरिएकोमा १३.६७ प्रतिशत अर्थात १ अर्ब ९६ करोड ११ लाख रुपैयाँमात्रै खर्च गरेको छ । 

बाग्मती प्रदेशले चालु आर्थिक वर्ष २०७७/७८ मा ५१ अर्ब ४२ करोड ७५ लाख रुपैयाँ बजेट अनुमान गरेकोमा १५.३ प्रतिशतमात्रै खर्च गरेको छ । 

यस प्रदेशले चालुतर्फ २६ अर्ब २८ करोड ७३ लाख रुपैयाँ विनियोजन गरेकोमध्ये १७.०२ प्रतिशत अर्थात ४ अर्ब ४७ करोड ४१ लाख रुपैयाँ खर्च गरेको छ ।

यस्तै पुँजीगत तर्फ पुस महिनासम्ममा ३ अर्ब २५ करोड २९ लाख रुपैयाँ खर्च गरेको छ । पुँजीगततर्फ २४ अर्ब १४ करोड २ लाख रुपैयाँ बजेट विनियोजन भएकोमा पुस मसान्तसम्ममा १३.४८ प्रतिशत खर्च भएको हो । 

यस्तै सुदूरपश्चिम प्रदेशले चालु आवको पहिलो ६ महिनामा १२.८२ प्रतिशत बजेट खर्च गरेको छ । यस प्रदेशमा ३३ अर्ब ३८ करोड १३ लाख रुपैयाँ बजेट विनियोजन भएकोमध्ये चालुतर्फ २ अर्ब २९ करोड २६ लाख रुपैयाँ खर्च गरेको छ । यस्तै पुँजीगत तर्फ १ अर्ब ९८ करोड ५८ लाख रुपैयाँ खर्च भएको छ । 

चालु आव २०७७/७८ को पुस मसान्तसम्ममा प्रदेश नम्बर २ र कर्णाली प्रदेशको भने खर्च न्यून भएको देखिएको छ । अर्थमन्त्रालयका अनुसार, प्रदेश नम्बर २ ले ९.५८ प्रतिशत र कर्णाली प्रदेशले ८.३९ प्रतिशतमात्रै खर्च गरेको छ । 
प्रदेश २ ले पुँजीगत तर्फ १ अर्ब ६२ करोड ७ लाख रुपैयाँ खर्च गरेको छ भने कर्णाली प्रदेशले १ अर्ब ११ करोड ९४ लाख रुपैयाँ खर्च गरेको छ ।

चालु अन्तर्गत प्रदेश २ ले १ अर्ब ५९ करोड ५६ लाख रुपैयाँ र कर्णाली प्रदेशले १ अर्ब ७१ करोड १३ लाख रुपैयाँ खर्च गरेको छ । 

तालिका