भूतपूर्व खेलाडी मञ्च नेपालले आयोजना गरेको १५ औं सफल पोखरा अन्तर्राष्ट्रिय म्याराथन उपाधि नेपाली सेनाका राजन रोकायाले जितेका छन् । प्रतियागितामा विगतमा झैं सेनाकै वर्चश्व रहेको छ । 

पोखरामा शनिबार भएको प्रतियोगितामा निर्धारित ४२.१९५ किमी दूरी रोकायाले २ घण्टा २८ मिनेट ५६ सेकेण्डमा पूरा गरी उपाधिसहित २ लाख तथा ट्रफी पुरस्कार जित्न सफल भए । 

दोस्रो भएका सेनाकै ज्ञानप्रसाद भट्टराईले २ घण्टा ३३ मिनेट ४८ सेकेण्डमा दौड पूरा गरी १ लाख र तेस्रो भएका देवीराज बस्नेतले २ घण्टा ४२ मिनेट ३३ सेकेण्डमा सो दूरी पूरा गरी ७५ हजार प्राप्त गरे । 

यसैगरी, पाँचथरका प्रदीप तामाङले २ घण्टा ५४ मिनेट ८ सेकेण्डमा दूरी पार गरी सान्त्वनासहित २५ हजार पुरस्कार प्राप्त गरेका छन् । 

महिला धावकमात्र सहभागी हाफ म्याराथन (२१ किमी) मा नेपाल प्रहरीकी राजपुरा पछाईँले उपाधि जित्न सफल भइन् । निर्धारित दूरी १ घण्टा २७ मिनेट १ सेकेण्डमा पूरा गरी उनले १ लाख र ट्रफी पुुरस्कार प्राप्त गरिन् । 

जुम्लाकी राममाया बुढा (१ घण्टा ३० मिनेट ५ सेकेण्ड) दोस्रो र सशस्त्र प्रहरी बलकी वृन्दा श्रेष्ठ (१ घण्टा ३१ मिनेट २ सेकेण्ड) तेस्रो हुँदै क्रमशः ७५ हजार र ५० हजार पुरस्कार प्राप्त गरे । नेपाल प्रहरीकी रेखा विष्टले १ घण्टा ३६ मिनेट २ सेकेण्डमा निर्धारित दूरी पूरा गर्दै सान्त्वनास्वरुप १५ हजार पुरस्कार जितिन् ।

म्याराथनमा २ सय ९ जना र हाफ म्याराथनमा २९ जना धावकले सहभागिता जनाएको आयोजक मञ्च अध्यक्ष तेजबहादुर गुरुङले जानकारी दिए । पोखरा रङ्गशालाबाट सुरु दौड पोखराका विभिन्न भाग पुगेर पुनः रंगशालामै आएको थियो । 

विजयीलाई मुख्यमन्त्री पृथ्वीसुब्बा गुरुङ, राखेप सदस्यसचिव रमेशकुमार सिलवाल, नेपाल ओलम्पिक कमिटीका अध्यक्ष जीवनराम श्रेष्ठ, मञ्च अध्यक्ष तेजबहादुर गुरुङलगायतले पुरस्कार वितरण गरे ।

मुख्यमन्त्री गुरुङले गण्डकी प्रदेश र पोखरालाई खेल पर्यटनको राजधानी बनाउनका लागि विभिन्न संघसंस्थाले गर्ने प्रतियोगिताले मद्दत पुगेको बताउँदै प्रदेश सरकार खेलकुद विकासमा प्रतिबद्ध रहेको बताए । 

यस वर्ष कोरोना कारणले विदेशी धावकले सहभागिता जनाएनन् । हाफ म्याराथन पहिलो पटक समावेश गरिएको हो । अन्य देशका सहरमा झैं पोखरालाई पनि सिटी म्याराथनको रुपमा अगाडि बढाउने उद्देश्यले प्रतियोगितालाई निरन्तरता दिइएको आयोजकले जनायो ।

प्रतियोगिताका अन्य इभेन्ट क्रमशः हुँदै जाने छन् । ह्वीलचियर दौड महिला र पुरुष तथा दृष्टिविहीन दौड २२ फागुनमा, १० किमी महिलापुरुष दौड १४ चैतमा र ५ किमी छात्रछात्रा दौड ४ वैशाखमा सम्पन्न हुनेछ । विजयीलाई नगदसहित पुरस्कृत गरिने आयोजकले जनाएको छ ।