०१ साउन २०८३, शुक्रबार
वेस्ट इन्डिजले बंगलादेशविरुद्धको दोस्रो टेस्ट म्याच १७ रनको विजय हासिल गर्दै दुई म्याचको शृंखला जितेको छ ।
ढाकाको शेरे बंगला नेसनल स्टेडियममा आइतवार सम्पन्न टेस्टमा वेस्ट इन्डिजले साँघुरो जीत हासिल गरेको हो ।
वेस्ट इनिडजको जीतमा राहकीम कोर्नवाल नायक रहे । उनले पहिलो इनिङमा पाँच र दोस्रोमा चार विकेट हात पारे ।
टस जितेर ब्याटिङ रोजेको वेस्ट इन्डिजले ४०९ रन बनाएको थियो । विकेटकीपर ब्याट्स्म्यान जोशुआ दा सिल्भाले ९२, न्क्रुमा बोन्नरले ९० र अल्जारी जोसेफले ८२ रन बनाए । बंगलादेशका अबु जायेद र तैजुल इस्लामले चार–चार विकेट हात पारे ।
जवाफमा बंगलादेशले पहिलो इनिङमा २९६ रन मात्र बनाउन सक्यो । लिटोन दासले ७१, मेहदी हसनले ५७ र मुश्फिकुर रहीमले ५४ रन बनाए ।
दोस्रो इनिङमा भने वेस्ट इन्डिजले राम्रो प्रदर्शन गर्न सकेन र जम्मा ११७ रनमा अलआउट भयो । बोन्नरको सर्वाधिक ३८ रन रह्यो ।
तर पहिलो इनिङमा राम्रो अग्रता लिएका कारण वेस्ट इन्डिज बलियो स्थितिमा थियो । जीतका लागि २३१ रनको लक्ष्य पछ्याउन बंगलादेशले प्रयास गरेकोमा २१३ रन मात्र बनाउन सक्यो ।
ओपनर तमिम इकबालले ५० रन बनाए भने अन्यले थोरबहुत योगदान दिए । अन्य ब्याट्स्म्यानले शुरूआत राम्रै गर्ने तर निरन्तरता दिन नसक्ने गरेकाले बंगलादेश लक्ष्यबाट टाढै रही हार बेहोर्न बाध्य भयो ।
पहिलो टेस्टमा वेस्ट इन्डिज तीन विकेटले विजयी भएको थियो ।
