ललितपुरको कुपण्डोलमा रहेको विध ल्याबले ‘ए’ ग्रेडको अनुमति पाएको छ ।

राष्ट्रिय जनस्वास्थ्य प्रयोगशालाले बुधवार ल्याबलाई ‘ए’ ग्रेडको प्रयोगशालाको अनुमति दिएको हो । 

जनस्वास्थ्य प्रयोगशालाले अनुगमन गर्दा ‘स्वास्थ्य प्रयोगशाला स्थापना तथा सञ्चालन मापदण्ड निर्देशिका २०७३’ अनुसार मापदण्ड पूरा गरेको पाइएकोले ‘ए’ ग्रेडको प्रयोगशाला सञ्चालन अनुमति दिइएको छ ।

जनस्वास्थ्य प्रयोगशालाकी निर्देशक रुना झाले एक पत्रमार्फत २०७८ असार मसान्तसम्मका लागि अनुमति जारी गरिएको बताएकी छन् । अनुमति पाएपछि ल्याबले अझै सर्वसुलभ मूल्यमा गुणस्तरीय सेवा प्रदान गर्ने प्रतिवद्धता गरेको छ । ल्याबका सञ्चालक विके भण्डारीका अनुसार अहिले करीब २ हजार ५०० प्रकारका टेस्टहरू ल्याबमा गरिने भएको छ ।

कोरोना भाइरस (कोभिड–१९) महामारीपछि सञ्चालनमा आएको ल्याबले देशभरिका ल्याबमध्ये सबैभन्दा बढी आरटी पीसीआर परीक्षण गरेको भण्डारीले जानकारी दिए । ल्याबमा जेनेटिक तथा मोलिकुलर सम्बन्धी सम्पूर्ण जाँच हुने जनाइएको छ ।

सञ्चालक भण्डारीले हाल चलनचल्तीको मूल्यभन्दा कम मूल्यमा परीक्षण गर्ने तयारीमा रहेको बताए । छोटो समयमा निकै चर्चा बटुलेको ल्याबले पोखरामा पनि आफ्नो सेवा  विस्तार गरिसकेको छ । 

हालसम्म गुणस्तरमा कुनै समस्या नआएको ल्याबले दाबी गरेको छ । ल्याबमा निःसन्तान दम्पत्तिका लागि पनि बाँझोपन परीक्षण सेवा उपलब्ध गराउन सुरू गरिएको ल्याबका कार्यकारी प्रमुख रविशंकर पोखरेलले बताए । उनका अनुसार १ महिनासम्म टेस्ट गर्न आउनेलाई १५ प्रतिशत छुटको व्यवस्था गरिएको छ भने ल्याबमा कोरोना भाइरस (कोभिड–१९) विरुद्धको एन्टिबडी परीक्षण पनि भइरहेको छ ।