१२ असार २०८३, शुक्रबार
सरकारले आगामी जुन महिनाभित्र सबै नागरिकलाई कोरोना भाइरस विरुद्धको खोप उपलब्ध गराइसक्ने लक्ष्य लिएको छ ।
स्वास्थ्य तथा जनसंख्या मन्त्रालयमा बिहीवार आयोजित पत्रकार सम्मेलनमा मन्त्री हृदयेश त्रिपाठीले भारतबाट ४ अमेरिकी डलरको दरले खोप खरिद प्रक्रिया अगाडि बढेको बताए ।
मन्त्री त्रिपाठीका अनुसार २० लाख डोज खोप खरिदका लागि सरकारले पैसा पठाइसकेको छ । भारतको सिरम इन्स्टिच्युट अफ इन्डियालाई रकम पठाइएको उनले बताए ।
यसअघि भारत सरकारले अनुदानमा खोप उपलब्ध गराएको थियो । अब सरकारले भारतबाटै खोप खरिद गर्दैछ ।
आगामी २ हप्ताभित्रै खरिद गरेको २० लाख डोज खोप समेत नेपाल आइसक्ने मन्त्री त्रिपाठीले बताए ।
नेपालमा कोरोना खोप आयात र बिक्रीका लागि निजी कम्पनीलाई समेत अनुमति दिने मन्त्री त्रिपाठीले बताए । मन्त्रिपरिषद् बैठकबाट मापदण्ड बनाएर खोप ल्याउन दिइने उनले बताएका छन् ।
