बहुविवाहका अभियुक्तलाई १ वर्ष कैद हुने फैसला

प्रतिकात्मक तस्वीर

बहुविवाहका आरोपित १ अभियुक्तलाई सप्तरी जिल्ला अदालतले १ वर्ष कैद र १० हजार रुपैयाँ जरिवानाको फैसला गरेको छ ।

जिल्ला न्यायाधीश प्रेमप्रसाद न्यौपानेको इजलासले सोमवार अभियोग दाबी पुग्ने फैसला गर्दै सिरहाको लहान नगरपालिका–१८ भदैयाका ३४ वर्षीय विनोदकुमार चौधरीलाई सजाय ठहर गरेको अदालतका सूचना अधिकारी हेमबहादुर बुढाथोकीले बताए ।


Advertisement

चौधरीकी पत्नी गयादेवी चौधरीले उनका पति विनोदले सप्तरीको सुरुङ्गा नगरपालिका–५ की २८ वर्षीया फुलकुमारी चौधरीसँग बहुविवाह गरेको भन्दै विक्रम संवत् २०७५ भदौ १४ गते इलाका प्रहरी कार्यालय कडरबोनामा उजुरी दर्ता गराएका थिए ।

आरोपित सुरुङ्गा नगरपालिका–६ स्थित त्रियुगा डिस्टिलरीमा कार्यरत छन् । आरोपित विनोदले फुलकुमारीकै घरमा बहुविवाह गरेको भन्दै पीडितले उजुरी दिएपछि इलाका प्रहरी कार्यालय कडरबोना सप्तरीले विनोदलाई विक्रम संवत् २०७५ भदौ १५ गते पक्राउ गरेको थियो ।

सप्तरी जिल्ला अदालतको आदेशमा आरोपित विनोद २०७५ असोज ११ गते ५० हजार रुपैयाँ धरौटी राखी पुर्पक्षका लागि तारेखमा रिहा भएका थिए ।

अर्का आरोपित फुलकुमारी हालसम्म पक्राउ परेकी छैनन् । उनको हकमा मुद्दा मुल्तबी राखिएको सूचना अधिकारी बुढाथोकीले जानकारी दिए । सामाजिक परम्पराअनुसार विक्रम संवत् २०६५ सालमा विवाह गरेका पीडितको १० वर्षीया १ छोरी छन् ।

कमेन्ट गर्नुहोस्