गृहमन्त्रीसमेत रहेका पूर्वमाओवादी पृष्ठभूमिका रामबहादुर थापा 'बादल'ले आफ्नै पुराना सहकर्मी नेत्रविक्रम चन्द 'विप्लव' नेतृत्वको नेकपालाई राजनीतिको मूलधारमा ल्याउने जिम्मेवारी पाएका छन् । पूर्वमाओवादी पृष्ठभूमिका नेतालाई वार्ताको जिम्मा दिएर विप्लवलाई फकाउने रणनीति ओली सरकारले लिएको छ ।

मंगलवार सरकारले 'विप्लव' नेतृत्वको नेकपासँग वार्ताका लागि गृहमन्त्री बादलको नेतृत्वमा वार्ता टोली गठन गरेको हो । प्रधानमन्त्रीका परराष्ट्र सल्लाहकार राजन भट्टराई वार्ता टोलीका सदस्य छन् ।

२०६९ सालमा तत्कालीन नेकपा माओवादी विभाजन भएर मोहन वैद्यको नेतृत्वमा नयाँ पार्टी गठन हुँदा बादल र विप्लव एक ठाउँमा थिए । ‘बूढा’हरुले क्रान्ति गर्न नसक्ने भन्दै विप्लवले वैद्यलाई छाडेर नयाँ पार्टी गठन गरेका थिए ।

बादल लगायतको टीम भने प्रचण्ड नेतृत्वको माओवादी केन्द्रमा फर्किएको थियो । माओवादी जनयुद्धको समयमा बादल र विप्लवको केमेष्ट्री मिल्ने गरेको पूर्वमाओवादी नेताहरु बताउँछन् ।

गृहमन्त्री थापाले सूत्रहरु मार्फत विप्लव समूहसँग अनौपचारिक कुराकानी गरेका थिए । सूत्रहरुसँगको कुराकानीपछि फागुन ८ गते विप्लव समूहले सरकारसँग वार्ता गर्न तयार रहेको विज्ञप्ति प्रकाशित गरेको थियो ।

सरकारका प्रवक्ता सञ्चार तथा सूचना प्रविधि मन्त्री पार्वत गुरुङले मंगलवार मन्त्रालयमा पत्रकार सम्मेलनको आयोजना गरी सरकारी वार्ता टोलीको घोषणा गरेका हुन् । विप्लव समूहबाट पनि छिट्टै वार्ता टोली गठन हुने र वार्ता प्रक्रिया शुरु हुने उनले विश्वास व्यक्त गरे ।

उता विप्लव समूहले प्रभावशाली नेता एवं प्रवक्ता खडगबहादुर विश्वकर्मा प्रकाण्डको नेतृत्वमा वार्ता टोली गठनको गृहकार्य गरेको छ । ‘दोस्रो वरियताको नेताको संयोजकत्वमा उच्चस्तरीय वार्ता टोली गठनको तयारी भएको छ,’ विप्लव निकट स्रोतले लोकान्तरसँग भन्यो ।

एक दुई दिनमै वार्ता गर्नेगरी विप्लव समूहको वार्ता टोली सार्वजनिक हुने स्रोतको दाबी छ । हिंसात्मक तथा विष्फोटक क्रियाकलापमा संलग्न भएको आरोप लगाउँदै सरकारले विप्लव समूहमाथि २०७५ फागुन २८ गतेदेखि प्रतिबन्ध लगाएको थियो ।