०६ असार २०८३, शनिबार
पाकिस्तानी संसद्को माथिल्लो सदन सिनेटका अध्यक्ष तथा उपाध्यक्ष पदका लागि भएका चुनावमा सत्तारूढ पाकिस्तान तहरीक–ए–इन्साफका उम्मेदवारले संयुक्त विपक्षी दलका उम्मेदवारलाई हराएका छन् ।
अध्यक्ष पदमा सरकारका उम्मेदवार सादिक संजरानीले ४८ तथा विपक्षी उम्मेदवार पूर्व प्रधानमन्त्री यूसुफ रजा गिलानीले ४२ भोट प्राप्त गरे । सिनेटमा कुल १०० सदस्य हुन्छन् तर दुईजना अनुपस्थित रहे अनि आठ भोट रद्द भए ।
यसअघि सिनेट चुनावमा पाकिस्तानको प्रतिष्ठित इस्लामाबाद सीटबाट विपक्षी दलका साझा उम्मेदवार गिलानीले सरकारी पक्षका उम्मेदवार अर्थमन्त्री हफीज शेखलाई हराएका थिए ।
गिलानीको शानदार जीतपछि विपक्षीहरूले सिनेट अध्यक्ष पदका लागि उनलाई संयुक्त उम्मेदवार बनाएका थिए तर उनी हारे ।
उपाध्यक्ष पदका लागि सत्तारूढ दलका उम्मेदवार मिर्जा अफ्रिदीले विपक्षी दलका अब्दुल गफूर हैदरीलाई हराए ।
चुनावमा प्रिजाइडिङ अफिसर मुजफ्फर हुसैन शाहले गिलानीका आठ मत बदर गरे किनकि सात सिनेटरले गिलानीको नाममाथि छाप हानेका थिए जबकि कोठाभित्र छाप लगाउनुपर्ने थियो । एक सिनेटरले चाहिँ दुवै उम्मेदवारको नाममा छाप हानेका थिए ।
यस मतदानपछि पाकिस्तानी राजनीतिमा नयाँ विवाद जन्मेको छ । सरकार र विपक्षीहरू आमनेसामने भएका छन् ।
एघार विपक्षी दलहरूको समूह पाकिस्तान डेमोक्रेटिक मुभमेन्टले भन्यो, ‘हामीबाट जीत खोसिएको छ, हामी अदालत जान्छौं ।’
सरकारले चाहिँ चुनावमा हारले विपक्षी गठबन्धनको अन्तिम संस्कार गरेको बतायो ।
सरकारले बाजी जितेको अनि विपक्षीले जितेको बाजी पनि हारेको टिप्पणी भइरहेको छ ।
