०३ असार २०८३, बुधबार
अस्ट्रेलियाको संघीय संसदमा यौन गतिविधिहरूमा संलग्न सरकारी कर्मचारीहरूको तस्वीर र भिडियो लीक गरिएको छ ।
त्यसअघि एक महिलाले संसद् परिसरमा आफूमाथि यौन शोषण गरिएको आरोप लगाएकी थिइन् । सरकारका शीर्ष अधिकारीलाई यसको जानकारी भए पनि उनीहरूले आरोपितमाथि कुनै कारवाही नगरेको उनले बताइन् ।
उनको खुलासापछि अस्ट्रेलियामा यौन हिंसाविरुद्ध प्रदर्शनहरू भएका छन् ।
अस्ट्रेलियाको पत्रिका दी अस्ट्रेलियन र च्यानल १० ले संसदमा यौन गतिविधिको भिडियो सार्वजनिक गरेका हुन् । भिडियो एक सूचनादाताले उपलब्ध गराएका हुन् ।
भिडियो सार्वजनिक भएपछि अस्ट्रेलियामा महिला तथा आम जनताले सरकारको विरोध चर्काएका छन् । सरकारले समयमै कारवाही नगरेको भन्दै मानिसहरू आक्रोश व्यक्त गरिरहेका छन् ।
टम नामक ह्विसलब्लोअरले मिडियालाई जानकारी गराएअनुसार, सरकारी कर्मचारी र स्टाफ संसद्को प्रेयर रूमलाई यौनकर्मका लागि उपयोग गर्छन् । यौनकर्मीहरूलाई पनि संसद् भवन ल्याउने गरिएको छ ।
कर्मचारीहरूको समूहले एकअर्कासँग निजी तस्वीर शेयर गर्ने गर्थ्यो भन्दै टमले कुनै कर्मचारीले कानून तोडेको नभए पनि नैतिक रूपमा उनीहरू खोक्रो भइसकेको बताए ।
भिडियो सार्वजनिक भएपछि एक कर्मचारीलाई तत्कालै हटाइएको छ । सरकारले थप कारवाही गर्ने बताएको छ ।
