०३ असार २०८३, बुधबार
विश्व महामारीका रूपमा फैलिएको कोरोना भाइरसका कारण प्रभावित भएको लुम्बिनी घुम्न आउने पर्यटकको संख्या केही हप्तायता दिनानुदिन वृद्धि हँुदै गएको छ ।
लुम्बिनी विकास कोषका सूचना अधिकृत राजन बस्नेतका अनुसार लुम्बिनी घुम्न आउने पर्यटकहरूको संख्या बढ्दै गएको छ ।
पछिल्लो तथ्यांकअनुसार लुम्बिनी घुम्नेमा आन्तरिक पर्यटकको संख्या नै अत्यधिक रहेको छ । कोषको तथ्यांकअनुसार बन्दाबन्दी खुलेपछि १ लाख ४१ हजार ५७९ नेपालीले लुम्बिनी भ्रमण गरेका छन् ।
५ हजार ७४८ भारतीय र १२० विदेशी नागरिकले बुद्ध जन्मस्थल लुम्बिनी भ्रमण गरेका छन् ।
कोषका सदस्य सचिव सानुराजा शाक्यले नेपालको विभिन्न ठाउँबाट भगवान बुद्धको जन्मस्थल लुम्बिनी घुम्न आउनेहरूको संख्या बढिरहेको बताए । कोरोनाका कारण मान्छेहरूमा सिर्जना भएको निराशा र चिन्ता हटाउन लुम्बिनीको भ्रमण फलदायी हुने पनि शाक्यले बताए ।
सामान्य अवस्थामा लुम्बिनी घुम्न आउने विदेशी पर्यटकको संख्या अत्यधिक रहने गरेकामा कोरोनाका कारण अधिकांश देशमा वैदेशिक हवाई उडान र सीमानाकामा सहज आवतजावत समेत नरहेको हँुदा यतिबेला विदेशी नागरिक लुम्बिनी आउन चाहेर पनि आउन नसकेको पर्यटन पुनरुत्थान समिति लुम्बिनी प्रदेशका संयोजक सागर अधिकारीले बताए ।
‘लुम्बिनीको पर्यटन पुनरुत्थानका लागि हामीले नेपाल पर्यटन बोर्ड, लुम्बिनी प्रदेश सरकार र पर्यटन सम्बद्ध विभिन्न निकायसँग मिलेर विभिन्न अभियान चलाइरहेका छौं । यसले लुम्बिनी घुम्न जान मान्छेहरूलाई उत्प्रेरित गर्नेछ,’ उनले भने ।
गत फागुन तेस्रो हप्ता लुम्बिनीको पर्यटन प्रवद्र्धनका लागि ब्रान्डिङ समेत गरिएको थियो । नेपाल पर्यटन बोर्डका कार्यकारी निर्देशक डा. धनञ्जय रेग्मीको नेतृत्वमा पर्यटन क्षेत्रका विज्ञहरूको समूहले मायादेवी प्रसूति मार्गको स्थलगत अवलोकन समेत गरेको थियो ।
