३१ असार २०८३, बुधबार
इजरायल र इरानबीच तनावपूर्ण सम्बन्ध चलिरहँदा अरब सागरमा इजरायलको एक मालवाहक जहाजमा इरानले क्षेप्यास्त्र प्रहार गरेको इजरायलका एक अधिकारीले जनाएका छन् ।
रोयटर्स समाचार संस्थाका अनुसार, जहाज तान्जानियाबाट भारततिर गइरहेको थियो । क्षेप्यास्त्र प्रहारले जहाजलाई खासै हानि त गरेन र जहाज यात्रा गरिरहेकै छ ।
जहाज निकै सुस्त गतिमा गइरहेको तर तीन घन्टापछि त्यसले सामान्य गति हासिल गरेको बताइएको छ ।
फेब्रुअरी महिनामा पनि गल्फ अफ ओमानमा इजरायली जहाजमा आक्रमण गरिएको थियो । एमभी हेलियोस रे नामक जहाजमा आक्रमण हुँदा इजरायलले इरानमाथि दोषारोपण गरेको थियो । इरानले आरोप अस्वीकार गरेको थियो ।
इरान र इजरायलबीचको तिक्ततापूर्ण सम्बन्ध विगत केही समययता झनै चर्किएको छ । केही मसयपहिले इजरायलका रक्षामन्त्री बेनी गान्जले इरान आणविक हतियार बनाइरहेमा इजरायलले उसको आणविक भट्टीमा आक्रमण गर्ने बताएका थिए । कसैको सहयोग नलिइकनै इरानमाथि आक्रमण गर्ने पनि उनको भनाइ थियो ।
उता इरानका रक्षामन्त्री अमीर हातमीले इजरायल आक्रमण गर्ने सोच राख्छ भने पनि तेल अभिभ जस्ता प्रमुख शहरहरूलाई आफूहरूले बर्बाद गरिदिने धम्की दिएका थिए । देशको रक्षा गर्ने हतियारहरू इरानसँग रहेको उनले बताएका थिए ।
