प्रधानमन्त्री केपी शर्मा ओलीले देशभर निर्माण हुने १६५ वटा सडक सञ्जालको शुभारम्भ गर्दा तनहुँमा २ वटा रणनीतिक सडक आयोजना छनोट भएको छ ।

तनहुँका २ रणनीतिक सडक योजना छनोट भएसँगै स्थानीयले खुशी व्यक्त गरेका छन् ।

तनहुँ निर्वाचन क्षेत्र नम्बर १ अन्तर्गत मादी मस्र्याङ्दी र तनहुँ क्षेत्र नम्बर २ अन्तर्गत गाईघाट गल्याङ सडकखण्ड छनोट भएको छ । २ निर्वाचन क्षेत्र रहेको तनहुँमा छनोट भएका २ रणनीतिक सडक आयोजनाका लागि ४०/४० करोड रुपैयाँ बजेट विनियोजन हुने भएको छ ।

ब्यास नगरपालिका–९ गजौडेका विजय आचार्यले मादी मस्र्याङ्दी मार्गलाई निर्वाचन क्षेत्र रणनीतिक योजनामा छनोट गरिएपछि खुशी व्यक्त गरेका छन् ।

‘वर्षौंदेखिको हाम्रो सपना वर्तमान सरकारले पूरा गर्ने भएको छ, अब कामले पनि गति लिन अपेक्षा लिएका छौं,’ उनले भने ।

ब्यास र भानु नगरपालिकाको सीमाबाट शुरू हुने मार्ग गोरखाको पालुङटारसम्म जोडिने छ । कूल ३२ किलोमिटर दूरीको सडकको १२ किलोमिटर दूरी कालोपत्र सम्पन्न भइसकेको छ ।

तनहुँ क्षेत्र नम्बर १ का प्रतिनिधिसभा सदस्य कृष्णकुमार श्रेष्ठले सडक कालोपत्रपछि यस क्षेत्रका स्थानीयको जीवनयापनमा सहजता आउने बताए ।