नेकपा एमाले नेता माधवकुमार नेपाल पक्षको स्थायी कमिटीले पार्टी अध्यक्ष केपी शर्मा ओलीलाई २०७५ जेठ २ गतेलाई आधार मानेर पार्टी एकतामा फर्कन आह्वान गरेको छ ।

शनिवार काठमाडौंमा बसेको बैठकले सर्वोच्च अदालतको फागुन २३ गतेको फैसला पछि दुवै पार्टी पूर्ववत अवस्थामा फर्केकोले २०७५ जेठ २ गतेलाई आधार मानेर पार्टी एकतामा फर्कन अध्यक्ष ओलीलाई आह्वान गरेको हो ।

बैठकपछि पत्रकारहरूसँग कुरा गर्दै स्थायी कमिटी सदस्य योगेश भट्टराईले भने, ‘फागुन २३ गते सर्वोच्च अदालतले गरेको फैसला दुवै पार्टीहरूलाई पूर्ववत अवस्थामा फर्कनको निम्ति निर्देशन दिएको छ, अदालतले त्यो अनुसार नै जेठ २ गतेलाई आधार मानेर पार्टी एकतामा फर्कन हामीले पार्टी अध्यक्षलाई समेत आह्वान गरेका छौं ।’

बैठकले देशभर संगठन निर्माण, सुदृढीकरण अभियानका साथै प्रशिक्षणका २ महिने कार्यक्रम सञ्चालन गर्ने निर्णय गरेको पनि नेता भट्टराईले बताए । उनले भने, ‘आगामी २ महिनाको लागि देशभर पार्टी संगठन निर्माण तथा सुदृढीकरण अभियान चलाउने निर्णय गरेको छ । यो अभियानको मूल नारा ‘नेकपा एमालेको एकता बचाऔं, कम्युनिस्ट आन्दोलनको रक्षा गरौं’ भन्ने मूल नारा तय भएको छ र २ महिना व्यापक अभियान चल्नेछ ।’

बैठकले चैत्र ४ र ५ गते सम्पन्न भएको राष्ट्रिय कार्यकर्ता भेलामा प्रस्तुत भएको अवधारणा पत्रलाई पूर्णरूप दिएको छ । अवधारणापत्रलाई प्रकाशित गरी पार्टीगत रूपमा देशभर वितरण गरिने नेता भट्टराईले बताए । उनले भने, ‘चैत्र ४ र ५ गते सम्पन्न भएको राष्ट्रिय कार्यकर्ता भेलामा प्रस्तुत भएको अवधारणपत्र (प्रतिवेदन) मा राष्ट्रिय भेलामा आएका सुझाव र अहिले स्थायी कमिटी र केन्द्रीय कमिटीका सुझाव र अहिले स्थायी कमिटी र केन्द्रीय कमिटीका कमरेडहरूबाट प्राप्त सुझावलाई समेत समावेश गरिकन यसलाई अन्तिम रूप दिएको छ । अब यो प्रकाशित भएर पार्टीव्यापी रूपमा वितरणमा जानेछ ।’

पार्टीमा उत्पन्न भएको अन्तरविरोधको राजनीतिक, सैद्धान्तिक, सांगठनिक र कार्यशैलीगत भिन्नताको पक्षलाई समेटेर प्रशिक्षण सामग्री बनाई पार्टीव्यापी रूपमा देशभर प्रशिक्षणको लागि वितरण गर्ने निर्णय पनि बैठकले गरेको छ ।

नेता भट्टराईले भने, ‘पार्टीमा उत्पन्न भएको अन्तरविरोध यसको राजनीतिक पक्ष, सैद्धान्तिक पक्ष, यसको वैचारिक पक्ष, संगठनात्मक पक्ष साथै पार्टीभित्र देखिएका कार्यशैलीगत भिन्नताहरू लगायतका विषयमा हामीले उठाउँदै आएका मुद्दाहरूलाई समग्रमा समेटेर प्रशिक्षण सामग्री बनाइने छ र त्यसलाई पनि प्रकाशित गरेर पार्टीव्यापी रूपमा प्रशिक्षणको निम्ति पठाइने छ ।’

बैठकले २०७५ जेठ २ गते कायम भएका कमिटीलाई पुनःसञ्चालन गर्ने र आवश्यकता अनुसार गठन, पुनर्गठन गरी देशभर प्रशिक्षण अभियान चलाउने निर्णय पनि गरेको छ । यसका निम्ति केन्द्रीय कमिटीका सदस्यहरूलाई केन्द्रीय प्रतिनिधिका रूपमा तोकेर जिल्ला पठाउने निर्णय पनि बैठकले गरेको छ ।

बैशाख ९ गते पार्टी स्थापना दिवसको अवसरमा कम्युनिस्ट आन्दोलनको एकताका लागि ध्यान दिँदै देशव्यापी रूपमा कार्यक्रमहरू गरी मनाउने र काठमाडौंमा भव्य कार्यक्रम गर्ने निर्णय पनि बैठकले गरेको छ ।

बैशाख १३ गते मनमोहन अधिकारीको स्मृति दिवस देशव्यापी रूपमा मनाउने र विराटनगरमा केन्द्रीय स्तरको कार्यक्रम गर्ने भएको छ । जेठ ३ गते मदन आश्रित स्मृति दिवसलाई पनि एकताकै शिलशिलामा जोड्ने र चितवनमा राष्ट्रिय स्तरको कार्यक्रम आयोजना गर्ने निर्णय बैठकले गरेको छ ।