२८ जेठ २०८३, बिहीबार
प्रमुख प्रतिपक्षी दल नेपाली कांग्रेसकी एक सांसदले वर्तमान सरकारलाई म्यानमारमा कूपछि बनेको सैनिक सरकारसँग तुलना गरेपछि सरकारका प्रभावशाली मन्त्रीले सांसद पदको गरिमा ख्याल गर्न सुझाव दिएका छन् ।
सोमवार बसेको प्रतिनिधि सभा बैठकमा परराष्ट्रमन्त्रीले सार्वजनिक महत्त्वको विषयमा मन्तव्य दिने कार्यक्रम थियो ।
मन्त्री प्रदीप ज्ञवालीले राष्ट्रपतिबाट हालै भएको बंगलादेश भ्रमणलगायत संसद्मा उठेका केही विषयमा धारणा राखेका थिए ।
त्यसपछि सभामुख अग्नि सापकोटाले मन्त्रीलाई रोष्टममै उभ्याएर सांसदहरूलाई प्रश्न गर्न समय दिए ।
प्रश्नका क्रममा नेपाली कांग्रेसकी सांसद डा. डीला संग्रौलाले सरकारलाई म्यानमारको सैनिक कूसँग तुलना गरेकी थिइन् ।
‘म्यानमारमा भएको सैनिक कू, आङसाङ सुकी लगायत थुप्रै लोकतन्त्रप्रेमीलाई थुनामा राख्ने, दिनहुँ नरसंहार र बालबालिकामाथिको हत्या, यो सरकारको ध्यान किन पुगेन, विमस्टेकको बैठकमा म्यानमारको कुरा किन उठेन ? म्यानमारको सैनिक कू र (नेपाल) सरकारको चरित्र उस्तै हो ?’
जवाफका क्रममा मन्त्री ज्ञवालीले सरकारलाई म्यानमारको सैनिक कूसँग तुलना गरेको भन्दै गम्भीर विमति जनाए ।
उनले हल्का प्रश्न गरेर सांसदको गरिमा नघटाउन आग्रह गरे ।
‘म एउटा प्रश्नप्रति विनम्रतापूर्वक अस्वीकृति जनाउन चाहन्छु, त्यस्ता प्रश्न नउठुन् भन्ने चाहन्छु । माननीय सदस्य बोल्दै जाँदा धेरै पर नपुगौं । म्यानमारको सैनिक कू र नेपालको सरकार कुनै तुलना हुने विषय हो ? त्यस्ता प्रश्नले हाम्रो गरिमा घट्छ । आफ्नो गरिमा घट्ने काम नगरौं,’ मन्त्री ज्ञवालीले भने ।
मन्त्री ज्ञवालीले म्यानमारमा भएको घटनाप्रति सरकार गम्भीर रहेको र उपयुक्त फोरममा कुरा उठाउने बताए ।
