२१ जेठ २०८३, बिहीबार
म्यान्मारमा सुरक्षाबलहरूले शुक्रवार यंगून शहर नजिक प्रदर्शनकारीहरूमाथि राइफल ग्रिनेड चलाउँदा ८२ जनाको मृत्यु भएको छ ।
म्यान्मारका स्थानीय सञ्चारमाध्यम तथा असिस्टेन्स एसोसिएसन फर पोलिटिकल प्रिजनर्स नामक संस्थाले यो जानकारी दिएका हुन् ।
उत्तरपूर्वमा रहेको बगो शहरमा सुरक्षाबलहरूको आक्रमणमा मारिएका मानिसको संख्या अनुमान गर्न सकिएको थिएन ।
प्रत्यक्षदर्शीहरूका अनुसार, सुरक्षाबलहरूले मारिएका व्यक्तिको शवलाई जेयार मुनी पगोडाको परिसरमा एकमाथि अर्को खात गरी राखेको थियो र उक्त क्षेत्रलाई चारैतर्फबाट घेरेको थियो ।
म्यान्मार नाउ पत्रिकाका अनुसार, सेनाले शुक्रवार बिहानैबाट गोली चलायो र अपराह्नसम्म चलाइरह्यो ।
विरोध प्रदर्शनका आयोजक ये हुतुतले बताए, ‘यो नरसंहार जस्तै हो । उनीहरू छायाँलाई समेत गोली हानिरहेका छन् ।’
म्यान्मारका सामाजिक सञ्जाल प्रयोगकर्ताहरूका अनुसार, धेरै मानिस शहर छोडेर भागेका छन् ।
सुरक्षाबलले पक्राउ गरेको र मारेको व्यक्तिहरूको सूची एएपीपीले तयार पारिरहेको छ । संस्थाका अनुसार, फेब्रुअरीमा गरिएको कूपछि सेनाले ६१८ जनाको ज्यान लिइसकेको छ । तर सेनाले यति ठूलो संख्यामा प्रदर्शनकारीहरू नमारिएको बताएको छ ।
