नेकपा माओवादी केन्द्रका अध्यक्ष एवं संसदीय दलका नेता पुष्पकमल दाहाल ‘प्रचण्ड’ले संसदीय समिति फेरेका छन् । 

२०७५ असारमा संसदीय समिति गठन हुँदा राज्य व्यवस्था तथा सुशासन समिति रोजेका प्रचण्डले समिति फेरेर कानून, न्याय तथा मानव अधिकार समिति रोजेका छन् ।

राज्य व्यवस्था समितिले प्रधानमन्त्री कार्यालय, गृह मन्त्रालयका अतिरिक्त अख्तियार दुरुपयोग अनुसन्धान आयोग लगायत संवैधानिक आयोग हेर्ने गर्छ । 

समितिको सभापति माओवादी केन्द्रकै शशी श्रेष्ठ छिन् । कानून, न्याय तथा मानव अधिकार समितिको सभापति एमाले सांसद कृष्णभक्त पोखरेल छन् । 

सभामुख अग्नि सापकोटाले प्रतिनिधि सभाको सोमवारको बैठकमा सदस्यहरूको नाम हेरफेरको सूचना सुनाएका थिए । राज्य व्यवस्था समितिमा रहेका उद्यमी सांसद विनोद चौधरीले अर्थ समिति रोजेका छन् ।