१९ असार २०८३, शुक्रबार
अस्ट्रेलियाले चीनसँग बेल्ट यान्ड रोड इनिसिएटिभ अन्तर्गतका दुईवटा सम्झौतालाई रद्द गरेको छ ।
बुधवार अस्ट्रेलियाकी परराष्ट्रमन्त्री मेराइस पेनले चीनसँगका चार सम्झौता रद्द गर्ने घोषणा गरिन् । तर त्यसमा बीआरआईका दुई सम्झौताको विशेष चर्चा छ ।
यी दुई सम्झौता अस्ट्रेलियाको संघीय सरकारले नभई भिक्टोरिया राज्यले सन् २०१८ र २०१९ मा गरेका थिए ।
कुनै पनि प्रान्त वा विश्वविद्यालयले गरेको निर्णयलाई रद्द गर्न सक्ने भिटो पावर अस्ट्रेलियाको संघीय सरकारले डिसेम्बरमा पाएको थियो ।
परराष्ट्रनीतिका कारण सम्झौता रद्द गरिएको परराष्ट्रमन्त्रीले बताइन् ।
उनले भनिन्, ‘यी चार सम्झौताहरू अस्ट्रेलियाको परराष्ट्रनीति र सम्बन्ध प्रतिकूल छन् ।’
बिहीवार पेनले यसमा पुनः सफाइ दिँदै यो निर्णय परराष्ट्र सम्बन्धमा स्थिरताका लागि गरिएको बताइन् ।
अस्ट्रेलिया चीनसँगको सम्बन्धका विषयमा प्रतिबद्ध छ र संसारका अन्य देशले अस्ट्रेलियाको संघीय सरकारको अधिकारलाई सम्मान गर्नुपर्छ, उनले भनिन् ।
चीनले अस्ट्रेलियाको निर्णयप्रति आपत्ति जनाएको छ ।
अस्ट्रेलियामा रहेको चिनियाँ दूतावासले यो चीनविरुद्ध अस्ट्रेलियाले उठाएको अनुचित र उत्तेजक कदम भएको बताएको छ ।
उसले बयानमा भनेको छ, ‘चीन र अस्ट्रेलियाबीचको सम्बन्धलाई थप राम्रो बनाउनका लागि अस्ट्रेलिया सरकार इमान्दार छैन भन्ने यसले प्रमाणित गरेको छ ।’
अस्ट्रेलियाको नयाँ कदमले द्विपक्षीय सम्बन्धलाई थप हानि गर्ने र आफैंलाई सिध्याउने चिनियाँ दूतावासको कथन छ ।
