कैलालीको टीकापुरमा बृहत ढल निकास तथा मानव मलमूत्र व्यवस्थापन आयोजना शुरू भएको छ ।

खानेपानी तथा ढल व्यवस्थापन विभागद्वारा सञ्चालन भएको आयोजनाको काम शुरू भएको हो । 

वर्षातको समयमा आकाशको पानीबाट हुने डुबानलाई रोक्ने उद्देश्यले काम शुरू गरिएको टीकापुर खानेपानी उपभोक्ता तथा सरसफाइ संस्थाका अध्यक्ष भैरवसिंह रावलले बताए ।

‘ढल निकासका लागि हामीले वषौंदेखि प्रक्रिया अगाडि बढाएका थियौं । जुन आज आएर सफल भएको छ,’ संस्थाका अध्यक्ष रावलले भने, ‘टीकापुरमा बर्सेनि वर्षात्को समयमा हुने ठूलो क्षति कम हुने छ । टीकापुरवासीको लामो समयको सपना पनि पूरा हुने भएको छ ।’ 

खानेपानी संस्थाले सुपरीवेक्षणको काम गर्दै आएको छ । संस्थाले आयोजनाको प्रक्रिया अगाडि बढाएको थियो भने टीकापुर नगरपालिकाले समन्वय गर्दै आएको थियो । २९.५ किलोमिटर लम्बाइको ढल निकासको पानी जमरा कुलोमा व्यवस्थापन गरिने छ ।

सडकमा आएको पानी सडकमा जम्मा नभई नालीमार्फत व्यवस्थापन हुनेछ । जसले डुबानका कारण बर्सेनि खेप्दै आएको सास्ती कम हुने अनुमान गरिएको छ । पहिलो चरणमा नगरपालिकाको वडा नम्बर १ बजार क्षेत्रमा र शक्तिनगर शिविरमा काम हुनेछ ।

बाढीका कारण सबैभन्दा प्रभावित हुने पनि बजार क्षेत्र र शिविर क्षेत्र भएकाले पहिलो चरणमा त्यहीअनुसार काम अगाडि बढाइएको खानेपानी संस्थाका अध्यक्ष रावलले बताए ।

६० करोड ६९ लाख ३ हजार रुपैयाँ लगानीमा निर्माण हुन लागेको आयोजनाको ठेक्का टुडी कन्स्ट्रकसनले पाएको छ । कूल लागतको ८५ प्रतिशत रकम एडीबीले सहयोग गरेको छ भने बाँकी १५ प्रतिशत नगरपालिकाले लगानी गरेको छ ।

आयोजनाले २ क्षेत्रमा काम गर्दै आएको शहरी खानेपानी तथा सरसफाइ आयोजना क्षेत्रीय आयोजना व्यवस्थापन कार्यालय पश्चिम क्षेत्र आयोजना कार्यान्वयन समूहका परामर्शदाता अरुण रोस्याराले जानकारी दिए । ‘ढल निकास र मानव मलमूत्र व्यववस्थापन गरी २ क्षेत्रमा काम भइरहेको छ,’ परामर्शदाता रोस्याराले भने, ‘२ कार्यक्रममध्ये मानव मलमूत्र व्यवस्थापन कार्यक्रम १ वर्षमा र ढलको नाली निर्माणको काम २ वर्षमा सक्ने गरी ठेकेदार कम्पनीसँग सम्झौता भएको छ ।’

सन् २०२० डिसेम्बरमा ठेकेदार कम्पनीसँग आयोजनाको सम्झौता भएको बताउँदै समयमै काम सम्पन्न हुने गरी नै काम अगाडि बढाइएको उनले बताए ।