०१ असार २०८३, सोमबार
नेपालमा कोभिडका केसहरू ह्वात्तै बढिरहेको, अस्पतालहरू भरिभराउ भइरहेको र देशका प्रधानमन्त्रीले अन्य मुलुकबाट सहायता मागिरहेको भनी सीएनएन लेखेको छ ।
नेपालमा एक लाख मानिसमा कोभिडको दिनहुँ २० वटा केस आइरहेको छ । भारतमा दुई हप्ताअघि यस्तै स्थिति थियो ।
‘कोभिडको अहिलेको लहरलाई रोक्न नसक्ने हो भने भारतमा अहिले जे भइरहेको छ, नेपालमा पनि त्यही स्थिति आउनेछ,’ नेपाल रेडक्रसका अध्यक्ष डा नेत्रप्रसाद तिम्सिनाले बताए ।
भाइरस तीव्र गतिमा फैलिरहँदा नेपालमा भारतको जस्तै वा त्यसभन्दा पनि खतरनाक संकट आउन सक्ने डर उत्पन्न भएको छ ।
नेपालको स्वास्थ्य प्रणाली कमजोर छ र भारतमा भन्दा प्रतिव्यक्ति चिकित्सकको अनुपात कम छ । अनि भारतमा भन्दा कम खोप यहाँका मानिसले लगाउन पाएका छन् ।
भीडभाड हुने धार्मिक उत्सव, राजनीतिक भेला र विवाह समारोहका कारण केसहरू बढिरहेका छन् । जनताले बेवास्ता गरेको अनि सरकारले सुस्त कदम चालेकोले पनि स्थिति बिग्रेको छ ।
‘परिस्थिति दिनानुदिन बिग्रिरहेको छ र भविष्यमा यो नियन्त्रण बाहिर जान सक्छ,’ स्वास्थ्य मन्त्रालयका प्रवक्ता डा समीर अधिकारीले बताए ।
नेपालले सीमामा नियन्त्रण गरेको र बढी प्रभावित क्षेत्रमा लकडाउन लगाएको भए पनि भाइरस रोक्न यो पर्याप्त नभएको केही मानिसले डर व्यक्त गरेका छन् । सगरमाथा आधार शिविरमा समेत कोरोना संक्रमण देखिएको छ ।
