०६ असार २०८३, शनिबार
कोरोनाकालमा मानवता पनि मरिरहेको देखिएको छ ।
भारतको उत्तर प्रदेशमा रहेको कानपुरमा रुघाखोकी लागेका एक वृद्धलाई उनका परिवारका सदस्यहरूले सडकमा मिल्काएका छन् ।
प्रहरीले कार ट्रेस गरेर वृद्धलाई फ्याँक्नेहरूलाई बोलायो र चेतावनी दिएर वृद्ध उनीहरूलाई सुम्पियो ।
सुरेन्द्र सिंह नामक ती वृद्धको विवाह भएको थिएन । उनी २० वर्षदेखि नातेदार गौरव र सौरभसँग बसिरहेका थिए ।
दुई दिनअघि उनलाई रुघाखोकी र ज्वरो आयो । त्यसपछि नातेदारहरूले कोरोनाको डर मान्दै घरबाट निकाले ।
घरबाट निकालिएपछि सुरेन्द्र अपरिचित व्यक्तिको घरबाहिर पल्टिए ।
त्यसपछि मानिसहरूले विरोध गरे र वृद्धलाई लिएर जान भने । सुरेन्द्रका भतिजा मुकेशलाई यसको सूचना दिइयो । मुकेश कार लिएर पुगे अनि वृद्धलाई कारमा राखेर एक किलोमिटर पर रहेको एक पसल बाहिर एउटा बिस्कुट दिएर भागे ।
पसलका कर्मचारीले रतनलाल नगर चौकी इन्चार्ज अरविन्द सिंहलाई यसको जानकारी दिए । उनले कारको नम्बर ट्रेस गरेर मुकेशलाई बोलाए अनि बेस्सरी हप्काए ।
मुकेशले वृद्धलाई अस्पताल लगेको तर भर्ना गराउन नसकेपछि त्यहाँ छोडिदिएको बताए । प्रहरीले कारवाही गर्ने डरले मुकेशले सुरेन्द्रलाई लिएर गए ।
