२९ असार २०८३, सोमबार
चीनमा रहेका अमेरिकी दूतावासले सामाजिक सञ्जालमा राखेको एउटा पोस्टमा विद्यार्थीहरूलाई कुकुरसँग तुलना गरेपछि चिनियाँहरू रिसाएका छन् ।
अमेरिकाका पूर्व राष्ट्रपति डोनल्ड ट्रम्पले गत जनवरी महिनामा चीनमा रहेका सबै गैरअमेरिकी नागरिकलाई कोरोना संक्रमणपछि अमेरिका प्रवेश गर्न रोक लगाएका थिए ।
बुधवार वीबो नामक सामाजिक सञ्जालमा चीनमा रहेको अमेरिकी दूतावासको भिसा सेक्सनले विद्यार्थीहरूलाई बाइडन प्रशासनले नियन्त्रण खुकुलो बनाइसकेको भए पनि किन कुरिरहेको भनी सोधेको थियो ।
‘
वसन्त आएको छ र फूल फुल्न थालेका छन् । तपाईं बाहिर गएर खेल्न आतुर कुकुर जस्तो हो ?’ चिनियाँ भाषामा लेखिएको पोस्टमा उल्लेख थियो । त्यससँगै खुशी भएको एक छाउरोले ढोका नाघ्न खोजेको भिडियो पोस्ट गरिएको थियो ।
त्यो देखेर वीबो प्रयोगकर्ताहरू रिसाए अनि यस्तो तुलना अनुपयुक्त रहेको बताए । उक्त पोस्टलाई पछि डिलिट गरिएको थियो ।
त्यस्तो पोस्ट नग्न जातिविभेद भएको प्रयोगकर्ताहरूको भनाइ छ । अमेरिकीहरूका लागि कुकुर सकारात्मक अर्थ दिने भए पनि चिनियाँका लागि नकारात्मक अर्थ लाग्छ भनी दूतावासका कर्मचारीले बुझ्न नसकेको वीबो प्रयोगकर्ताको भनाइ छ ।
बेइजिङमा रहेको अमेरिकी दूतावासका एक प्रवक्ताले बिहीवार बिहान यस पोस्टका लागि माफी मागेका छन् ।
