२३ जेठ २०८३, शनिबार
काठमाडौं, १६ जेठ — फिलिपिनी सेनाले मंगलवार दक्षिणी शहर कब्जा गरिरहेका मुसलमानी लडाकुहरूलाई आत्मसमर्पण गर्न आग्रह गरेको छ । लडाईं आठौं दिनमा प्रवेश गर्दा सुरक्षाकर्मीहरूले हतियारयुक्त गाडी तथा हेलिकप्टरबाट रकेट प्रहार गरेर बन्दुकधारीहरूलाई सिध्याइरहेका छन् ।
मरावी नामक स्थानमा इस्लामिक स्टेटसँग आबद्ध माउते समूहले कब्जा जमाइरहेको छ । सरकारले मरावी क्षेत्र आफ्नो नियन्त्रणमा आउनै लागेको बताएको छ । माउतेले शहरका केही भाग कब्जा गरेको अवस्थामा सुरक्षाकर्मीहरूले लडाकुका नेता इस्निलोज हापिलोनलाई नियन्त्रणमा लिनका लागि असफल प्रयास गरेका थिए ।
‘हामीहरू बाँकी आतंकवादीहरूलाई अवसर छँदै आत्मसमर्पण गर्नका लागि आह्वान गर्छौं,’ सेनाका प्रवक्ता रेस्टिट्युटो पदिलाले भने ।
यो लडाईंमा सयभन्दा बढी व्यक्तिको मृत्यु भइसकेको छ र त्यसमा लडाकुको संख्या नै बढी भएको सेना बताउँछ । शहरका अधिकांश निवासीहरू भागिसकेका छन् ।
तैपनि अझै हजारौं मानिस त्यहाँ अड्किएका छन् र उनीहरूलाई भाग्ने क्रममा लडाकुले समात्लान् भन्ने पीर छ ।
रोयटर्सबाट
