३० जेठ २०८३, शनिबार
भारतको उत्तर प्रदेशमा रहेको कानपुरस्थित एक अस्पतालमा कोरोना रोगीको अक्सिजन मास्क निकालेर महिलाहरूले पूजाआजा गरेका छन् ।
ह्यालट अस्पतालको कोभिड वार्डमा यो घटना भएको हो ।
दुई महिला आएर रोगीको अक्सिजन मास्क निकालेको र पूजापाठ गरेर जयजयकार गर्दै रोगी ठीक भएको दाबी गरेका थिए ।
उनीहरूले वैदिक मन्त्रोच्चारणका साथ भगवानको नाम लिएर जयजयकार गरेका थिए । आफूलाई कोरोना सर्नसक्ने चिन्ता उनीहरूले नलिएको देखिन्छ ।
केही समयपछि कोरोना रोगीको मृत्यु भएपछि दुवै महिलाले अस्पतालमा हंगामा मच्चाएका थिए । वार्डका चिकित्सकले लापरवाही गरेको आरोप उनीहरूले लगाए ।
ती महिलाहरू जबर्जस्ती वार्डमा पसेको बताइएको छ ।
घटना अप्रिल २२ मा भएको बताइएको छ ।
राति डा आलोक वर्माले रोगीको उपचार गरिरहँदा रोगीलाई हेर्ने भन्दै जबर्जस्ती वार्डमा आए । उनीहरूले नर्सलाई रोगी उपचारले ठीक हुँदैन भने । भूतप्रेतको छायाँ रोगीमा परेको भन्दै उनीहरू बेडमा पूजापाठ गर्न थाले ।
त्यसक्रममा उनीहरूले रोगीको अक्सिजन पनि झिकिदिए । अस्पतालका कर्मचारीले रोक्ने कोशिश गर्दा उनीहरू झगडा गर्न तम्सिए ।
केही समयपछि रोगीको मृत्यु भयो । एकछिन हंगामा मच्चाएपछि उनीहरू अस्पतालबाट गए ।
भोलिपल्ट रोगीलाई कोरोना प्रोटोकल अन्तर्गत अन्त्येष्टि गरियो ।
प्रहरीले घटनाको अनुसन्धान गर्न आनाकानी गरेको छ ।
