बहुमतीय सरकार गठनका लागि राष्ट्रपति विद्या भण्डारीले दिएको समय सीमा सकिएको छ ।  संविधानको धारा ७६ को २ अनुसार सरकार गठनका लागि राष्ट्रपति भण्डारीले आज राति ९ बजेसम्मको समय दिएर सोमवार आह्वान गरेकी थिइन् । 
नेपाली कांग्रेस, माओवादी केन्द्र र जसपाको उपेन्द्र यादव पक्षले वैकल्पिक सरकार गठनको लागि प्रयास गरेपनि त्यो सार्थक बन्न नसकेको हो । धारा ७६ को उपधारा २ अनुसारको सरकार बन्न नसकेपछि अब धारा ७६ को उपधारा ३ अन्तरगत प्रतिनिधि सभाको ठूलो दल नेकपा एमाले संसदीय दलका नेता केपी शर्मा ओली प्रधानमन्त्री नियुक्त हुने बाटो खुलेको छ । 

सत्ता समीकरणका लागि निर्णायक मानिएको जसपाको महन्थ ठाकुर पक्ष ओलीको विकल्पमा अर्को सरकार बनाउन राजी नभएपछि वैकल्पिक सरकार गठनको सम्भावना टरेको हो । कांग्रेस सहमहामन्त्री डा प्रकाशशरण महतले जसपाको महन्थ ठाकुर पक्षले सहयोग नगरेका कारण वैकल्पिक सरकार गठन गर्न नसकिएको बताए । 

कांग्रेसले सभापति एवं संसदीय दलको नेता शेरबहादुर देउवालाई प्रधानमन्त्री बनाउन प्रस्ताव गरेको थियो । माओवादी केन्द्रले देउवाको नेतृत्वमा सरकार गठन गर्न समर्थन जनाएको थियो । 
आफ्नो नेतृत्वमा सरकार गठनका  लागि कांग्रेस सभापति देउवाले बिहीवार जसपा अध्यक्ष ठाकुर र राजेन्द्र महतोसँग भेटवार्ता गरेका थिए । उनीहरुसँगको भेटपछि देउवाले माओवादी केन्द्रका अध्यक्ष पुष्पकमल दाहाल प्रचण्डसँग भेटवार्ता गरेका थिए । 

एमालेको माधव नेपाल पक्षका सांसदले राजीनामा गरेर बहुमत जुटाउने देउवा र प्रचण्डको योजना रहेपनि नेपाल पक्षले राजीनामा नगरेपछि वैकल्पिक सरकार गठनको संभावना टरेको माओवादी केन्द्रका एक स्थायी कमिटी सदस्यले बताए । कांग्रेस र माओवादीले संविधानको धारा ७६ को ५ अनुसार सरकार गठनको प्रक्रिया शुरु भएमा त्यो बेला पनि प्रयास गर्ने बताएका छन् । 

राति ९ बजेसम्म बहुमतीय सरकार गठन गर्न दलहरुले सहमति जुटाउन नसकेपछि राष्ट्रपतिले संविधानको धारा ७६ को उपधारा ३ अनुसार प्रतिनिधि सभामा प्रतिनिधित्व गर्ने सबभन्दा ठूलो दलको नेतालाई प्रधानमन्त्री नियुक्ति गर्ने स्रोतले बतायो । 

संविधानको धारा ७६ को उपधारा ३ अनुसार प्रधानमन्त्री नियुक्त भएपछि ३० दिनभित्र पुन विश्वासको मत लिनुपर्ने संवैधानिक व्यबस्था छ । विश्वासको मत लिन नसके फेरि धारा ७६ को उपधारा ५ अनुसार प्रतिनिधि सभाको कुनै सदस्यले बहुमत जुटाएर सरकार बनाउने प्रक्रिया शुरु हुनेछ ।