अक्सिजन अभाव हुन थालेपछि चितवन जिल्लाका अस्पतालले प्लान्टको क्षमता विस्तार गर्न थालेका छन् ।

बाहिरी जिल्लाबाट अक्सिजन आउन छाडेपछि मागअनुसार अक्सिजन पुर्‍याउन कठिन भएको छ ।

जिल्लाका २ मेडिकल कलेज र भरतपुर अस्पतालले प्लान्ट विस्तार गर्न लागेका हुन् । 

जिल्लामा कोरोनाको उपचार गराइरहेका २ सरकारी र २ मेडिकल कलेजमा आफ्नै प्लान्ट भएपनि बिरामीको संख्या बढेपछि उद्योगबाट अक्सिजन ल्याउनुपर्ने बाध्यता रहेको छ । पुरानो मेडिकल कलेजले गैंडाकोटमा रहेको आफ्नो प्लान्टलाई विस्तार गर्दैछ । अस्पतालका आवासीय निर्देशक डा. मनोहर प्रधानले २४ घण्टामा ४०० सिलिन्डर उत्पादन हुँदै आएकामा २०० सिलिन्डरको क्षमता थप गर्न लागिएको बताए ।

उद्योगमा यसअघि नै प्लान्ट भएको भन्दै उनले ट्रान्सफरमर र स्टेपलाइजर जडान गरी यसै हप्ता थप उत्पादन गर्ने तयारी गरिएको उनले जानकारी दिए । मेडिकल कलेजमा हाल दैनिक ३०० सिलिन्डर आवश्यक पर्ने गर्दछ । 

चितवन मेडिकल कलेजले १ दिनमा ६००  सिलिण्डर उत्पादन हुने नयाँ प्लान्ट ल्याउँदैछ । अस्पतालका अध्यक्ष एवं प्रबन्ध निर्देशक प्रा.डा. हरिशचन्द्र न्यौपानेले एलसी खोलेर प्रक्रिया अघि बढेको बताए । उनले भने, ‘१ हप्ताभित्र सामान जडान हुने अपेक्षा लिएका छौं ।’

हाल अस्पतालको प्लान्टले २०० सिलिन्डर अक्सिजन हाराहारी उत्पादन गर्दै आएको । बिरामीको चाप बढेपछि हाल दैनिक ४०० सिलिन्डर अक्सिजन बाहिरबाट ल्याउनुपरेको छ । 

भरतपुर अस्पतालले नयाँ प्लान्ट थप गर्ने तयारी गरेको छ । अस्पताल विकास समितिका अध्यक्ष डा. भोजराज अधिकारीका अनुसार स्वास्थ्य मन्त्रालयबाट १२ करोड रुपैयाँ बजेट आउने भएकाले छिट्टै प्रक्रिया अघि बढाइँदैछ ।

दैनिक थप २४० सिलिण्डर उत्पादन हुने गरी प्लान्ट जडान गर्न लागिएको उनको भनाइ छ । भरतपुर अस्पतालमा हाल रहेको प्लान्टले दैनिक ७५ सिलिन्डर अक्सिजन उत्पादन गर्छ भने खपत २०० भन्दा बढी रहेको छ ।

स्वास्थ्य कार्यालय चितवनका प्रमुख दीपक तिवारीका अनुसार दैनिक १ हजार २०० सिलिन्डर जिल्लाका अस्पतालहरूमा आवश्यक पर्दछ । चितवनका ४ अस्पताल र एउटा निजी उद्योगको गरी ८८० सिलिन्डर मात्रै उत्पादन हुँदै आएको छ । दैनिक ३२० सिलिन्डर अक्सिजन जिल्लामा अपुग भएको उनले जानकारी दिए ।