२२ असार २०८३, सोमबार
ताउते चक्रवाती तुफानका कारण अरब सागरमा डुबेको बार्ज पी–३०५ जहाजका ४९ कर्मचारी अझै पनि हराइरहेका छन् ।
त्यसमा भएका ७५ मध्ये २६ जनाको मृत्यु भइसकेको छ ।
भारतीय जलसेनाले दिनरात खटेर यी मानिसहरूको खोजतलाश गरिरहेको छ ।
समुद्रमा यसअघि पनि मानिसहरू हराएर निकै पछि भेटिएको इतिहास पाइन्छ । कुल १३३ दिन हराएर समेत मानिस जिउँदै फर्किएको इतिहास छ ।
चीनका पून लिम समुद्रमा हराएर १३३ दिनपछि फर्किएका हुन् । सन् १९४२ को नोभेम्बर महिनादेखि १९४३ को अप्रिलसम्म पून समुद्रमा हराए । उनी बेलायती जहाजका कर्मचारी थिए । दोस्रो विश्वयुद्ध चलिरहेको बेलामा दक्षिण
अफ्रिकाको केपटाउनबाट अमेरिकातिर जाँदै गरेको जहाजमा जर्मनीका नाजीहरूले यू–बोटमार्फत आक्रमण गरे ।
आक्रमण भएलगत्तै पून जहाजबाट समुद्रमा हाम्फाले र दुई घन्टासम्म तैरिरहे । त्यसपछि उनले लाइफ र्याफ्ट फेला पारे । त्यसमा अलिकति बिस्कुट, टर्च र ताजा पानी थियो । केही दिनमै त्यो सबै सकियो अनि उनले समुद्रमा माछा मारेर खाए ।
अमेजन नदीमा पुगेपछि उनलाई ब्राजिलका तीनजना माझीले बचाए ।
जिउँदै फर्केर आएपछि उनलाई बेलायतका राजा जर्ज छैटौंले ब्रिटिश एम्पायर मेडलबाट सम्मान गरे । बेलायतको जलसेना रोयल नेभीले उनको कथालाई सर्भाइभल म्यानुअलमा संलग्न गरेको थियो ।
