२४ जेठ २०८३, आइतबार
नेपाल सरकारको आग्रहमा स्पेन सरकारले कोभिडविरुद्ध लड्न १४ करोड २५ लाख नेपाली रुपैयाँ बराबरको स्वास्थ्य सामाग्री सहयोग गरेको छ ।
सहयोगमा १५ रेस्पिराटोर, १० अक्सिजन कन्सन्ट्रेटर र त्यसका लागि चाहिने अन्य पार्टसहरू, १ लाख ४४ हजार माक्स, १ लाख २५ हजार एन्टिजेन लगायत रहेका छन् ।
स्पेन सरकारले ५ टनभन्दा धेरै विभिन्न अत्यावश्यक स्वास्थ्य सामग्री सहयोग गरेको स्पेनका लागि नेपाली दूतावास म्याड्रिडले प्रेस विज्ञप्तिमार्फत जनाएको छ ।
स्पेनका लागि नेपाली राजदूत दावाफुटी शेर्पा र स्पेनिस सहयोग नियोगका निर्देशक म्याग्डी मार्टिनेज सहितको टोली स्वास्थ्य सामग्री लिएर आइबेरिया एअरलाइन्सको चार्टर विमानमा म्याड्रिडबाट बिहीवार काठमाडौं अवतरण गरेको छ ।
बुधवार परराष्ट्रमन्त्री प्रदीपकुमार ज्ञवाली र स्पेनका विदेशमन्त्री अरन्चा गोल्जालेजबीच टेलिफोन वार्ता भएको थियो । टेलिफोन वार्ताका क्रममा ज्ञवालीले नेपाललाई स्वास्थ्य सामग्री सहयोग गरेकोमा स्पेन सरकारलाई धन्यवाद दिएका थिए ।
यसअघि युरोपेली युनियनले नेपाललाई २८ करोडको स्वास्थ्य सहायता उपलब्ध गराउने घोषणा गरिसकेको छ ।
