नेकपा एमालेका प्रवक्ता प्रदीप ज्ञवालीले सांसद पद नरहेका मन्त्रीको नियुक्ति बदर गर्ने सर्वोच्च अदालतको आदेशको सम्मान गर्ने बताएका छन् । 

प्रधानमन्त्री निवास बालुवाटारमा बसेको एमाले स्थायी कमिटी बैठकपछि पत्रकारले सोधेको प्रश्नमा सरकारका मन्त्री समेत रहेका प्रवक्ता ज्ञवालीले अदालतको निर्णयको सम्मान गर्ने बताएका हुन् । 

‘मैले पनि भर्खरै थाहा पाएँ । अदालतको आदेशका बारेमा हाम्रो सधैँ एउटै प्रतिक्रिया रहन्छ । कतिपय हाम्रा फरक राय हुन सक्छन्, तर अदालतको फैसलाको सम्मान गर्छौं,’ ज्ञवालीले भने । 

प्रधानन्यायाधीश चोलेन्द्र शमशेर जबराको एकल इजलासले बिहीवार नै अन्तरिम आदेश दिँदै सांसद नरहेका ७ मन्त्रीलाई काम गर्न रोक लगाएको थियो ।

सर्वोच्चको आदेशपछि रामबहादुर थापा, टोपबहादुर रायमाझी, लेखराज भट्ट, प्रभु साह, गौरीशंकर चौधरी लगायत ७ मन्त्रीको पद गुमेको छ ।

माओवादीबाट एमाले प्रवेश गरेका उनीहरूले सांसद पद गएपछि नै दोहोर्‍याएर मन्त्री पदको शपथ लिएका थिए । सांसद नै नरहेका मणि थापा र दावा लामाले पनि अब मन्त्रीका रूपमा काम गर्न पाउने छैनन् ।