इजरायल र प्यालेस्टाइनबीच युद्धविराम भएको छ ।

दुई देशबीचको सहमतिअनुसार स्थानीय समयअनुसार शुक्रवार (आज)बिहान २ बजेदेखि युद्धविराम शुरू भएको बीबीसीले जनाएको छ । 

इजिप्टको प्रस्ताव अनुसार युद्धरत दुई देशले युद्धविरामको सहमति गरेका हुन् । थप वार्ताका लागि इजिप्टले इजरायल र प्यालेस्टाइनमा प्रतिनिधिहरु पठाउने बताइएको छ । 

प्यालेस्टाइनले केही दिनदेखि युद्धविरामको पहल गरिरहे पनि इजरायलले मानेको थिएन । अहिले पूर्वसर्त बिना युद्धविरामका लागि इजरायलले सहमति जनाएको बीबीसीले जनाएको छ । 

दुई देशबीच भएको ११ दिनको युद्धमा प्यालेस्टाइनको गाजा क्षेत्रमा कम्तीमा दुई सय २७ जनाको मृत्यु भएको छ भने हमासको आक्रमणबाट इजरायलतर्फ १२ जनाको मृत्यु भएको छ ।