भारतलाई रेस्लिङमा ओलम्पिक पदक जिताएका सुशील कुमारलाई जुनियर पहलमान सागर धनखडको हत्याको आरोपमा प्रहरीले पक्राउ गरेको छ । 

उनका सहयोगी अजय सहरावतलाई पनि पक्राउ गरी सोमवार ६ घन्टासम्म सोधपुछ गरिएको छ । 

हत्यामा संलग्न तथा अहिले फरार रहेका नौजना आरोपितका बारेमा थाहा पाउन प्रहरीको केरकार जारी छ । 

पक्राउ परेपछि सुशीललाई आफ्नो करीयरको चिन्ता लागेकाले हिरासतमा रातभरि रोएको प्रहरीले जानकारी दिएको छ । लकअपमा उनी धेरैपटक ग्वाँ ग्वाँ रोएको, खाना पनि नखाएको र रातभरि नै जागेको प्रहरीले जनायो । 

अपराध शाखाको टोलीले घटनाको सबै पक्षको मिहिन जाँच गर्न खोजिरहेको छ । टोलीले छत्रसाल स्टेडियम पुगेर घटनास्थलको ग्राफ पनि बनाएको छ । सुशीललाई सहयोग गर्ने महिला खेलाडीलाई पनि सोधपुछ गरिँदैछ । 

मोडल टाउन एम ब्लकको फ्ल्याटमा पनि अनुसन्धान टोली पुगेको छ । त्यहाँ सुशील र उसका साथीहरूले सागरलाई अपहरण गरेर राखेका थिए । 

आफूले सागरलाई मार्न नचाहेको, पाठ पढाउन मात्र खोजेको भनी सुशीलले प्रहरीलाई बयान दिएका छन् ।