नेपाली कांग्रेसका नेता रमेश लेखकले सर्वोच्च अदालतले कांग्रेस सभापति शेरबहादुर देउवालाई प्रधानमन्त्री नियुक्त गर्नुपर्ने बताएका छन् ।

सोमवार सर्वोच्च अदालतमा देउवाको पक्षमा बहुमत देखिएको उनले दाबी गरे । 

कांग्रेस संसदीय दलको कार्यालयमा विपक्षी गठबन्धनका शीर्ष नेताहरूको छलफलपछि पत्रकारसँग कुरा गर्दै लेखकले देउवालाई प्रधानमन्त्री नियुक्त नगर्दा संसदीय प्रणाली र संविधानको जीवित रहन नसक्ने जिकीर गरेका हुन् । 

‘संसदीय व्यवस्थामा बहुमतले सरकार बनाउने हो नि ! हिजो अदालतमा बहुमत देखियो नि ! संसद्ले बहुमत भनेको मानिस प्रधानमन्त्री नभए प्रधानमन्त्री हुने को हो ? संसदीय पद्धतिमा बहुमत सांसदले प्रधानमन्त्री प्रस्ताव गरेको मानिस प्रधानमन्त्री बन्दैन भने अनि संविधान जीवन्त रहन्छ ? व्यवस्था जीवित रहन्छ ?’ लेखकले भने । 

संविधानसभाका पूर्व सदस्य समेत रहेका लेखकले संविधानको धारा ७६ को उपधारा १ देखि ३ सम्म राजनीतिक दलले सरकार बनाउने भए पनि उपधारा ५ मा सांसदको भूमिका रहने जिकीर गरे । ‘७६ को १ देखि ३ सम्म दलको कुरा छ, दलले सरकार बनाउन नसके सांसदको कुनै दृष्टिकोण या मान्यता हुँदैन ? संविधानले दिएको भूमिका हो नि !’ उनले भने । 

शीर्ष नेताहरूबीच मंगलवारको बैठकमा सर्वोच्च अदालतमा कानूनी लडाइँ कसरी लड्ने भन्नेबारे छलफल भएको उनले जानकारी दिए ।

कांग्रेस संसदीय दलको कार्यालय सिंहदरबारमा भएको छलफलमा कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र एमाले नेता माधवकुमार नेपाल सहभागी थिए । 

प्रतिनिधिसभा विघटनविरुद्ध विपक्षी गठबन्धनको तर्फबाट बहुमत सदस्यले सोमवार सर्वोच्च अदालतमा रिट दर्ता गरेका छन् ।