२१ असार २०८३, आइतबार
नेपाली सेनाले विश्व वातावरण दिवसका अवसरमा सफा हिमाल अभियानमा संलग्न सैनिक टोली र सहयोगी संस्थालाई कदरपत्र प्रदान गरेको छ ।
सैनिक मुख्यालय जंगी अड्डामा शनिवार आयोजित कार्यक्रममा प्रबन्धरथी उपरथी गोकुल भण्डारीले उनीहरूलाई कदरपत्र प्रदान गरे ।
सेनाको अगुवाइमा सर्वाेच्च शिखर सगरमाथा सहित ल्होत्से, मकालु, धवलागिरी, पुमोरी र आमादब्लम हिमालबाट गत चैत ३१ गतेदेखि जेठ १५ गतेसम्म २७ हजार ६७१ किलो फोहर संकलन गरिएको थियो ।
अभियानका क्रममा संकलन गरेको नकुहिने २५ हजार १६६ फोहर प्रशोधनका लागि काठमाडौं ल्याएर सम्बन्धित संस्थालाई हस्तान्तरणका साथै कुहिने २ हजार ५०५ किलो सम्बन्धित क्षेत्रका स्थानीय तहलाई बुझाइएको थियो ।
यस क्रममा धौलागिरी हिमालको आधार शिविरमा भेटिएका २ शव र सगरमाथाको चौथो क्याम्पमा फेला परेका २ शव उचित व्यवस्थापनका लागि सम्बन्धित अधिकारीलाई बुझाइएका सैनिक जनसम्पर्क तथा सूचना निर्देशनालयले जनाएको छ ।
कदरपत्र हस्तान्तरण कार्यक्रममा उपरथी भण्डारीले अभियानले हिमाल सफाई सम्बन्धमा आम जनतालाई सूसूचित गराउन,मुलुकको अमूल्य नीतिका रूपमा रहेका हिमालको मनोरम कायम राख्न तथा नागरिक–सैनिक सम्बन्ध विस्तार र सहकार्यमा नमूना प्रस्तुत भएको बताए ।
