३० जेठ २०८३, शनिबार
मासु खाने मानिसको तुलनामा शाकाहारी भोजन गर्नेलाई कोभिड–१९ गम्भीर रूपमा लाग्ने जोखिम ७३ प्रतिशत कम हुने एक नयाँ अध्ययनले देखाएको छ ।
अघिल्ला अध्ययनहरूले कोभिड संक्रमणको गम्भीरता तथा अवधि र भोजनबीचको सम्बन्ध देखाएकोमा अनुसन्धाताहरूले त्यसमा थप परीक्षण गरेका हुन् ।
सन् २०२० को जुलाईदेखि सेप्टेम्बर महिनासम्म भाइरसबाट संक्रमित भएका २८ सय ८४ जना चिकित्सक र नर्सहरूमाझ सर्वेक्षण गरिएको थियो । जोन्स हप्किन्स ब्लूमबर्ग स्कूल अफ पब्लिक हेल्थले भोजन र कोभिड–१९ को गम्भीरताका विषयमा अध्ययन गरेको हो ।
सर्वेमा भोजन, स्वास्थ्य इतिहास र कोभिडका लक्षणका बारेमा सोधिएको थियो । त्यसपछि मासु नखाने मान्छेमा गम्भीर कोरोना कम हुने पाइएको हो ।
शाकाहारी भोजनमा भिटामिन, पोषक तत्त्व तथा मिनरलहरू बढी हुने भएकाले स्वस्थ रोगप्रतिरोधक प्रणाली बन्ने र गम्भीर कोभिड नलाग्ने अनुसन्धाताहरूको निष्कर्ष छ ।
शाकाहारी भोजनमा कोलेस्ट्रोलको मात्रा मासुको भन्दा कम हुने कुरा ५० वटा अध्ययनको साझा निष्कर्ष छ ।
शाकाहारीहरू हरियो सागपात, फलफूल र काजुबदाम खाने हुनाले स्याचुरेटेड फ्याट कम लिन्छन् ।
यी खानेकुराहरू घुलनशील फाइबर, सोय प्रोटीन र बिरुवामा पाइने स्टेरोलले भरपूर हुन्छन् र तिनमा कोलेस्ट्रोलको मात्रा कम हुन्छ ।
