कोरोना संक्रमणका कारण जारी निषेधाज्ञामा सेवाग्राहीको भीड हुँदा सेवा निवृत्त कर्मचारीलाई पेन्सन लिन सकस भएको छ ।

लमजुङको बेंसीशहरको राष्ट्रिय बाणिज्य बैंक शाखामा एकैचोटी ठूलो भीडभाडमा कोरोना संक्रमणको जोखिम मोलेर पेन्सन लिनुपर्ने बाध्यता भएको छ । 

सेवा निवृत्त शिक्षक लेखनाथ शर्माले भीडभाडले जोखिम उच्च रहेकाले डराई–डराई पेन्सन लिन बस्नु परिरहेको र जागिर खानुभन्दा पनि पेन्सन लिन बढी सकस भएको धारणा राखे ।

पूर्व प्रहरी हवल्दार शन्तबहादुर गुरुङ भन्छन्, ‘कोरोना संक्रमणका बेला कम भीडभाड हुन्छ होला भनेर पेन्सन लिन आएको, यहाँ त ठूलो भीडभाड पो रैछ ।’

कमल लोहनी, रामबहादुर रावल लगायतले सरकारले व्यवस्थित रूपमा पेन्सन वितरणको व्यवस्था गरेको भए यस्तो समस्या भोग्नु नपर्ने धारणा राखे ।

राष्ट्रिय बाणिज्य बैंकका शाखा प्रमुख सोमनाथ पौडेलले पहिला २ वटा काउन्टर मात्र सञ्चालन गर्दै आए पनि अहिले ६ वटा काउन्टरबाट पेन्सन लिन आएकालाई सेवा प्रवाह गरिरहेको र यस्तो भीड आगामी आइतवारसम्म पनि हुनसक्ने बताए ।

शाखाबाट पेन्सन लिने २ हजार २०० जना रहेका राष्ट्रिय वाणिज्य बैंकले जनाएको छ । बंैकका अनुसार निषेधाज्ञाका कारण हप्तामा आइतवार र बिहीवार मात्र बैंक खुल्दा कर्मचारीलाई १ हप्ताको काम १ दिनमै गर्नुपर्ने बाध्यता भइरहेको छ । शाखाको भीड बैंकले व्यवस्थापन गर्न नसकेपछि प्रहरी समेत परिचालन गरिएको थियो ।

प्रमुख जिल्ला अधिकारी होमप्रसाद लुइँटेलले पेन्सन लिन आएको तथा अन्य सेवाग्राहीका लागि सामाजिक दूरी कायम गर्न बैंकहरूलाई निर्देशन दिएको बताए । तर सेवाग्राहीको भीडभाड अलिअलि भने स्वभाविक हुने तर्क उनको छ ।