काठमाडौं, १३ पुस — तराई आन्दोलनमा भएको क्षतिको विवरण संकलन गर्न बनेको आयोगमा अहिलेसम्म एक सय ६० वटा उजुरी तथा सूचना दर्ता भएका छन् ।

तराई, मधेश र थरुहट लगायका क्षेत्रमा विभिन्न राजनीतिक दलहरुले गरेको आन्दोलनका क्रममा भएका हिंसा, हत्या, आगजनी, तोडफोड लगायतका घटनाहरुको सत्य तथ्य छानविन सम्बन्धि उच्चस्तरीय आयोगमा यी सूचना दर्ता भएका हुन् ।

साउन महिनादेखि काठमडौंमा कार्यालय स्थापना गरेर आयोगले काम गरिरहेको छ । मंसिर १६ गते देखि पुस १३ गते सम्मको अवधिमा सो संख्यमा उजुरी परेका हुन् ।

पुस १५ गते उजुरी दर्ता गर्ने समय सकिन लागेको छ । तर आयोगले विभिन्न पक्षबाट आएका सुझावहरुलाई मनन गर्दै उजुरी संकलनको समय थप १५ दिन बढाएको जनाउको छ । अब माघ एक गते सम्मनै उजुरी दर्ता गर्न पाइने आयोगले आज एक सूचना निकालेर जनाएको हो ।