काठमाडौं, २१ जेठ –अख्तियार दुरुपयोग अनुसन्धान आयोगले विद्युत मिटर जडान गर्ने क्रममा घूस रकम लिएको भन्दै नेपाल विद्युत प्राधिकरणका एक कर्मचारीलाई नियन्त्रणमा लिएको छ । प्राधिकरणको भद्रपुर शाखामा कार्यरत मिटर रिडर राम बहादुर महतले सेवाग्राहीको नवनिर्मित घरमा विद्युत मिटर जडान गर्दा घूस लिएको भेटिएपछि अख्तियारले नियन्त्रणमा लिएको हो ।

मिटर जडान गर्दा महतले विभिन्न बहानामा सेवाग्राहीबाट घूस लिएको उजुरीका आधारमा आयोगको कार्यालय, इटहरीको टोलीले उनलाई पाँच हजार रुपैयाँ घूस रकमसहित नियन्त्रणमा लिएको हो ।

भ्रष्टाचार निवारण ऐन, २०५९ को दफा ३ को उपदफा (१) बमोजिमको कसूर गरेको पुष्टि भएको भन्दै आयोगले महतलाई पाँच हजार रुपैयाँ बिगो सहित कैद सजाय हुन मागदावी लिई आइतवारै विशेष अदालत काठमाडौंमा मुद्दा दायर गरेको छ ।