०७ साउन २०८३, बिहीबार
तीनपटक युरो कप जितिसकेको जर्मनीले शनिवार पोर्चुगललाई हराएपछि ग्रुप एफ रमाइलो मोडमा आइपुगेको छ ।
फ्रान्ससँग हारेर रन्थनिएको जर्मनीलाई यस जीतले ठूलो रहात दिएको छ र हंगेरीसँगको खेलका लागि आत्मविश्वास बढाएको छ ।
जीतसँगै जर्मनी ग्रुपमा दोस्रो स्थानमा छ र शीर्ष स्थानमा रहेको फ्रान्सभन्दा एक अंक मात्र कम छ । पोर्चुगलसँग जर्मनीको समान अंक छ ।
ग्रुप एफलाई ग्रुप अफ डेथ भनिएको छ किनकि प्रत्येक टोलीले दुई खेल खेलिसकेको भए पनि कुनै पनि टीम राउन्ड अफ १६ का लागि छनोट भएका छैनन् । अन्तिम खेलको नतिजा नआउन्जेल कुन टीम माथि जाने हो भन्ने टुंगो लाग्ने छैन ।
पोर्चुलगलले फ्रान्ससँगको खेल जितेमा सीधै माथि जानेछ । नत्र फ्रान्ससँग बराबरी भएमा अनि जर्मनी हंगेरीसँग हारेमा पनि पोर्चुगल माथि जानेछ । पोर्चुगल र जर्मनी दुवै हारेमा पोर्चुगल पुछारमा पुग्नेछ ।
फ्रान्ससँग चार अंक छ र पोर्चुगलसँग ऊ हारेन भने वा हंगेरी र जर्मनीबीचको खेल बराबरी भयो भने माथि जानेछ । पोर्चुगललाई हराएमा ऊ पहिलो हुनेछ । अनि बराबरी गरेमा चाहिँ जर्मनीले हंगेरीलाई हराएन भने मात्र माथि जानेछ । फ्रान्सले हारेछ अनि हंगेरीले जितेछ भने दोस्रो स्थानमा रहने टोली गोल अन्तरको आधारमा छानिनेछ ।
जर्मनीको तीन अंक छ र हंगेरीलाई हराएमा ऊ सीधै माथि जानेछ । बराबरी गरेछ भने फ्रान्स पोर्चुगलसँग नहारे मात्र जर्मनी माथि जानेछ । जर्मनीले हंगेरीविरुद्धको खेल जित्यो र फ्रान्सले पोर्चुगललाई हराएन भने जर्मनी पहिलो हुनेछ । तर बराबरी गरेछ र फ्रान्सले हारेछ भने जर्मनी तेस्रो स्थानमा हुनेछ । जर्मनी र पोर्चुगल दुवै हारेछन् भने पनि जर्मनी तेस्रो स्थानमा रहनेछ ।
हंगेरीको एक अंक छ । उसले जर्मनीलाई हराएछ र पोर्चुगल पनि हारेछ भने दोस्रो स्थानमा पुग्नेछ । उसले जितेछ र फ्रान्सले हारेछ भने गोल अन्तरका आधारमा दोस्रो स्थान निर्धारण हुनेछ । हंगेरीले जर्मनीलाई हराएछ र फ्रान्स तथा पोर्चुगलबीचको खेल बराबरीमा टुंगिएछ भने हंगेरी तेस्रो स्थानमा रहनेछ ।
