रूपन्देहीको कञ्चन गाउँपालिका (रुद्रपुर) का २४ वर्षिय बिशाल केसी आइतबार बिहान उठेर दाँत माझ्दै थिए ।

एक्कासी ब्रस घाँटीबाट पेटतिर छिर्‍यो । उनी आत्तिए । डराए । नजिकैको मेडिकलमा गएर एक्सरे गरे । एक्सरे गर्दा केही देखिएन । बिरामीलाई झन पछि झन दुखाई बढ्दै गयो । घरपरिवार पनि आत्तिए । उनलाई तत्कालै बुटवलस्थित लुम्बिनी प्रादेशिक अस्पतालमा ल्याइयो ।

बुटवल अस्पतालमा ल्याएर इन्डोसकोपी गरियो । इन्डोसकोपी गर्दा उनको खाना नलीमा ब्रस अड्किएको देखियो । त्यसपछि प्रदेशिक अस्पतालको नाक कान घाँटी रोग विशेषज्ञको टीम शल्यक्रिया गरी उनको अड्किएको ब्रस निकाल्न कँस्सिए । 

बिशेषज्ञ डाक्टरहरु विष्णु शर्मा, नेत्रबहादुर थापा, दिपेन्द्र कसौधन सहितको स्वास्थ्यकर्मीको टोलीले सफल अप्रेशसन गरी उनको ब्रस घाँटीबाट निकाल्न सफल भयो । चिकित्सकको टोलीले बिरामीको घाँटीबाटै १८ सेन्टिमिरटर लामो ब्रस निकालेको हो । डा.शर्माले यस्ता घटना बिरलै हुने गरेको बताए ।  

डा. शर्माले भने, ‘इन्डोस्कोपी गर्दा खाना खाने नलीमा छातीको बीच भागमा अड्किएको देखियो । त्यसपछि बिरामीको अवस्थाको बारेमा आफन्तलाई जानकारी गराएर बिना चिरफार शल्यक्रिया गरिएको हो ।’

चिकित्सहरुका अनुसार उनको शल्यक्रिया जटिल त थियो ।

घाँटीबाट छिरेको ब्रस छातीको बीचभागमा पुगिसकेको भए त्यो पेटसम्म पनि पुग्न सक्थ्यो, या आन्द्रा छेडेर शरीर भित्रै आन्द्रा बाहिर पनि जानसक्थ्यो । यो सबै कुरा बिरामीका आफन्तलाई ब्रिफिङ् गराएर ब्रस निकाल्न सुरु गरिएको डा. शर्माले बताए ।

सोही अनुसार बिरामीका आफन्तले पनि उपचार अगाडि बढाउन आग्रह गरे ।

राइड ओसोफ्यागोस्कोपी प्रविधिबाट उनको शल्यक्रिया गरिएको हो । चिकित्सकहरुका अनुसार यो प्रविधिमा बिरामीलाई बेहोस गराइन्छ तर चिरफार गर्नुपर्दैन । मुखबाट क्यामेरा जडित पाइप छिराएर त्यसको सहायताले समातेर निकाल्ने प्रविधिलाई ओसोफयागोस्कोपी भनिन्छ । 
 

उक्त प्रविधिको प्रयोग गरेर यो शल्यक्रिया सफल नहुन पनि सक्थ्यो र तत्कालै चिरफार गर्नपर्ने पनि हुन सक्थ्यो । सोही अनुसार सर्जनहरुलाई पनि स्ट्याण्डबाई राखिएको थियो । खाना खाँदा घाँटीमा खाना अड्कीने, मासु खाँदा हडडी अडकिने जस्ता घटना त सुनिरहेकै हो । तर सिंगै ब्रस नै घाँटीबाट छिरेको घटना अलि नौलो नैं मानिएको छ ।