चीनले निकै द्रुत गतिमा आणविक हतियारहरू निर्माण गरेपछि अमेरिकाले चिन्ता व्यक्त गर्दै हतियार निर्माणको दौडले ल्याउने अस्थिरताका बारेमा बेइजिङलाई स्मरण गराएको छ । 

द वाशिङटन पोस्टले दिएको एक खबरअनुसार, चीनले पश्चिमी भागमा रहेको मरुभूमि क्षेत्रमा १०० वटा नयाँ मिसाइल सिलोहरूको निर्माण गरिरहेको छ । 

अमेरिकाको परराष्ट्र मन्त्रालयका प्रवक्ता नेड प्राइसले बिहीवार आयोजित नियमित पत्रकार सम्मेलनमा यस विषयमा सोधिएको प्रश्नमा जवाफ दिएका छन् । 

‘यी समाचार तथा अन्य घटनाक्रमले चीनको आणविक हतियार कार्यक्रम तीव्र गतिमा बढिरहेको र पहिले सोचेको भन्दा उच्च स्तरमा रहेको देखिएको छ,’ उनले बताए । 

‘यसरी हतियार बढाउनु चिन्ताजनक छ । यसले चीनको उद्देश्य के हो भन्ने विषयमा प्रश्न उठाउँछ । अनि आणविक जोखिम घटाउनका लागि व्यावहारिक उपाय अपनाउनुपर्ने आवश्यकतालाई पनि यसले सुदृढ गर्छ,’ उनले बताए । 

‘हतियारको होडका कारण आउने अस्थिरताको जोखिमलाई घटाउने व्यावहारिक उपाय पहिल्याउन हामी बेइजिङलाई हामीसँग कुराकानी गर्नका लागि आह्वान गर्छौं,’ उनले भने । 

यही कारणले गर्दा राष्ट्रपति जो बाइडनले रणनीतिक स्थिरताका लागि रुसका राष्ट्रपति भ्लादिमिर पुटिनसँग वार्तालाई प्राथमिकतामा राखेको प्राइसले बताए । यही कुरा चीनको हकमा पनि लागू हुने उनको भनाइ छ ।