११ साउन २०८३, सोमबार
प्रहरीले संगठनको मुख्य मानिएका संरचना हेरफेर गरेको छ । सरकारले नयाँ प्रहरी अतिरिक्त महानिरीक्षक (एआईजी)को दरबन्दी थप गरेसँगै प्रहरीमा नयाँ संरचना परिवर्तन भएको हो ।
कार्य एवं अपराध अनुसन्धान विभागलाई टुक्राएर कार्य विभाग र अपराध अनुसन्धान विभाग बनाउन लागेको प्रहरी प्रवक्ता प्रहरी वरिष्ठ उपरीक्षक (एसएसपी) वसन्त कुँवरले पुष्टि गरे ।
तत्कालीन प्रहरी महानिरीक्षक (आईजीपी) सर्वेन्द्र खनालको पालामा एआईजीको दरबन्दी कटौती गरेर तीन जना मात्र हुँदा कार्य विभाग र अपराध अनुसन्धान विभागलाई एउटै बनाइएको थियो ।
अहिले फेरि नयाँ एआईजीको दरबन्दी थप भएर डीआईजी सहकुल थापा एआईजीमा बढुवा सिफारिस भएसँगै पुरानै अवस्थामा फर्किएको छ ।
अब कार्य विभाग र अपराध अनुसन्धान विभाग अर्थात् अपरेसनमा छुट्टाछुट्टै एआईजीले नेतृत्व गर्नेछन्।
अहिले कार्य एवं अपराध अनुसन्धान विभागको प्रमुखमा एआईजी विश्वराज पोखरेलले नेतृत्व गर्दै आएका छन् ।
अहिले पोखरेल मातहत लागुऔषध नियन्त्रण ब्युरो, महिला तथा बालबालिका सेवा निर्देशनालय, इन्टरपोल, फरेन्सिक ल्याब लगायत छन् ।
सीआईबीमा एआईजी दरबन्दी थप्ने चर्चा
केन्द्रीय अनुसन्धान ब्युरो (सीआईबी)मा एआईजीको दरबन्दी थप गरेर अपराध अनुसन्धानका कामहरू त्यसै मातहत राख्ने चर्चा चलेको छ ।
प्रहरी प्रधान कार्यालय स्रोतलाई आधार मान्ने हो भने सीआईबी मातहत लागुऔषध नियन्त्रण ब्युरो, मानव बेचबिखन तथा ओसारपसार नियन्त्रण ब्युरो, साइबर ब्युरोमा परिवर्तन गरेर काम गर्ने खाका तयार भएको बतायो ।
अहिले प्रहरी महानिरीक्षक (आईजीपी) मातहतमा सीआईबी, साइबर ब्युरो र विशेष ब्युरोले काम गरिरहेका छन् ।
अपराध अनुसन्धानका विषय र आन्तरिक अपराधका बारेमा अनुसन्धान र विश्लेषण गर्ने मुख्य ब्युरोहरू आईजीपी मातहतमा छन् ।
