नेपाल प्रहरीले ४५ लाख रुपैयाँ जरिवाना ठहर भएपछि फरार रहेका १ व्यक्तिलाई पक्राउ गरेको छ ।

प्रहरीको केन्द्रीय अनुसन्धान ब्यूरो (सीआईबी) ले बैंकिङ कसूर मुद्दामा उच्च अदालत पाटनले ४५ लाख रुपैयाँ जरिवाना गरेपछि फरार रहेका ललितपुर महानगरपालिका–१ कुपण्डोलका ५० वर्षीय शिशिरशम्शेर जबरालाई सोमवार पक्राउ गरेको हो । 

ब्यूरोका प्रवक्ता एवं प्रहरी उपरीक्षक श्यामकुमार महतोले उच्च अदालत पाटनको विक्रम संवत् २०७७ माघ २६ गतेको फैसलापछि १० दिन कैद र बिगो बमोजिम ४५ लाख रुपैयाँ जरिवानापछि फरार रहेका जबरालाई सोमवार काठमाडौंको बिजुली बजारबाट पक्राउ गरिएको जानकारी दिए ।

पक्राउ परेका उनले आफ्नो नविल बैंकको खातामा पर्याप्त मौज्दात नहुँदा नहुँदै विभिन्न व्यक्तिलाई झुक्यानमा पारी चेक दिएर बैंकिङ कसुरजन्य अपराध गरेका थिए । उच्च अदालतले उनलाई बंैकिङ कसूर तथा सजाया ऐन २०६४ को दफा ३ (ग) बमोजिमको कसूरमा दफा १५ (१) बमोजिम उल्लेखित सजाय हुने गरी फैसला सुनाएको थियो । 

पक्राउ परेका उनलाई फैसला कार्यान्वयनका लागि सोमवार ललितपुर जिल्ला अदालतमा पेश गरिएको  प्रवक्ता महतोले बताए ।